भांगरभूंय | प्रतिनिधी
धनगरांचो लेगीत एसटी आसपाव जावंक जाय : रमेश तवडकार
पणजी : येवपी विधानसभेंत एसटीक आरक्षण दिवप शक्य आसा काय ना, हे विशी केंद्र सरकार १५ दिसांनी भुमिका स्पश्ट करतलें. सॉलिसीटर जनरला कडेन चर्चा करून आपूण मुख्यमंत्री डॉ. प्रमोद सावंत हांकां आरक्षणाच्या कार्यवायेविशीं निर्णय कळयतां, अशें गृहमंत्री अमीत शहा हांणी सांगिल्ल्याचें आदिवासी कल्याण खात्याचे मंत्री रमेश तवडकार हांणी सांगलें. हेर समाजा भशेन धनगरांचो लेगीत एसटींत (अनुसूचीत जमातींत) आसपाव जावपाक जाय, अशें तांणी सांगलें.
डॉ. सावंत हांच्या फुडारपणा खाला ७ जुनाक गोंयच्या शिश्टमंडळान अमित शहा हांची भेट घेतिल्ली. येवपी विधानसभेंत एसटी आरक्षणाची कार्यवाही करपाची मागणी शिश्टमंडळान केल्ली. हे विशीं उलयतना श्री. तवडकार हांणी ही म्हायती दिली.
एसटी आरक्षणाचो कायदो संसदेंत संमत जाला. हाका लागून हेर समाजाक फुडें काडून एसटी आरक्षणाक विरोध करप अयोग्य आसा. कायदो जाल्ल्यान एसटी आरक्षणाची कार्यवाय जातलीच, अशें तवडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
