भांगरभूंय | प्रतिनिधी
रितें मंत्रिपदूय बेगीनूच भरतले, मुख्यमंत्री दिल्लीच्यान परतले
पणजी : २०२७च्या विधानसभा वेंचणुकेंत एसटी आरक्षण लागू करपाक राज्य सरकारा वतीन फाटपुरवण चालूच आसा. मुख्यमंत्री डॉ. प्रमोद सावंत हांणी हे विशीं दिल्लींतूय चर्चा केल्या. एसटी आरक्षणाचेर दिल्लींत चर्चा जाल्ल्याची म्हायती डॉ. सावंत हांणी दिली. रितें मंत्रिपद बेगीनूच भरतले अशें मुख्यमंत्र्यान सांगलें.
दिल्लीत केंद्रीय रान आनी पर्यावरण मंत्री भूपेंद्र यादव हांचे कडेन सीआरझेड आनी हेर पर्यावरणासंबंदी विशयांचेर चर्चा जाली. हे विशीं केंद्रीय जलशक्ती मंत्री सी. आर. पाटील हांचे कडेन विवीध उदका पुरवण प्रकल्पांचेर चर्चा जाली. साळ न्हंय आनी सांत इनेज खाडीचें शुद्धीकरण करतले. हे खातीर प्रकल्प आराखडो (डीपीआर) केंद्राक धाडटले. हे खातीर केंद्रा कडल्यान निधी अपेक्षित आसा. उदकाचो योग्य तरेन वापर करपाचेरूय चर्चा जाली. दामू नायक हे पक्षाच्या कामा खातीर गेल्ले. तांणी संघटनेविशीं पक्षाच्या फुडार्यां कडेन चर्चा केली, अशें मुख्यमंत्र्यान म्हणलें.
फाटल्या सप्तकांत प्रधानमंत्री नरेंद्र मोदी, गृहमंत्री अमित शहा आनी हेर केंद्रीय मंत्र्यांच्यो भेटी घेतले उपरांत मुख्यमंत्री डॉ. प्रमोद सावंत आयतारा रातीं परत दिल्लीक गेल्ले. ताचे पयलीं शुक्रारा सत्ताधारी आमदार, मंत्री हांची जोड बसका तांणी घेतिल्ली. सोमारा सकाळीं तांणी केंद्रीय रान आनी पर्यावरण मंत्री भूपेंद्र यादव हांची भेट घेवन शाश्वत उदरगतीचेर चर्चा केली. तशेंच केंद्रीय जलशक्ती मंत्री सी. आर. पाटील हांचे कडेन तांणी उदकापुरवण प्रकल्पाचेर चर्चा केली. उपरांत आयज ते गोंयांत परतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
