भांगरभूंय | प्रतिनिधी
पणजी : जनगणने पयलीं एसटी आरक्षण लागू करपाक क्षत्रीय मराठा समाज आनी भंडारी समाजान विरोध केल्या उपरांत आतां मतदारसंघ आरक्षीत जावपाची शक्यताय आशिल्ल्या मतदारसंघातल्यान विरोध जावपाक लागला. जनगणने पयलीं सांगें मतदारसंघ एसटी खातीर आरक्षीत करचो न्हय, अशें निवेदन सांगेंच्या ग्रामस्थांनी मुख्यमंत्री तशेंच प्रदेश भाजप अध्यक्षाक दिले उपरांत आयतारा काणकोणा आरक्षणाक विरोध जालो. १२ टक्के एसटी समाजा खातीर ८८ टक्के भोवजन समाजाचेर अन्याय नाका, अशी मागणी काणकोणच्या बसकेंत जाली.
येवपी वेंचणुकेंत एसटी आरक्षणाची कार्यवाय करपाचें आस्वासन मुख्यमंत्री डॉ. प्रमोद सावंत हांणी प्रेरणा दिसाचे कार्यावळींत दिला. हाचे उपरांत राज्यांतल्या एसटी फुडार्यांनी एकठांय येवन विधानसभा वेंचणुकेंत एसटी आरक्षण लागू करपाची मागणी केल्या. हे विशीं केंद्रीय गृहमंत्री अमित शहा हांचे कडेन चर्चा जावपाची आसतनाच जनगणने पयलीं ते लागू करपाक विरोध जावपाक लागला. येवपी वेंचणुकेंत आरक्षण लागू जालें जाल्यार तें २०११च्या जनगणनेचेर आधारीत आसतले. ह्या पोरण्या लोकसंख्येचेर आधारीत मतदारसंघ आरक्षीत करप अयोग्य आनी अन्यायकारक थारतले अशी भुमिका क्षत्रीय मराठा समाज आनी भंडारी समाजान घेतल्या. आतां सांगें आनी काणकोण मतदारसंघांतल्या कांय लोकांनी लेगीत हीच भुमिका घेतल्या. हाका लागून एसटी आरक्षणाविशीं आतां नवो वाद तयार जाला.
सांगें, केपें, काणकोण, प्रियोळ आनी नुवें ह्या मदल्या ४ मतदारसंघ एसटी खातीर आरक्षीत जावपाची शक्यताय आसा. सांगें आनी आतां काणकोणच्या लोकांनी अपलो मतदारसंघ आरक्षीत करपाक हरकत घेतल्या.
जनगणनेचो एक पायंडो पुराय जाला आसलो तरी फुडल्या वर्सा दुसरो पावंडो जातलो. गोंय विधानसभेचो कार्यकाळ २०२७ वर्सा सोंपता. त्यान पयलीं जनगणना पुराय जावप शक्य नाशिल्ल्यान आरक्षण हे पायलींच्या म्हळ्यार २०११च्या जनगणनेचेर लागू करपाचे यत्न सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
