भांगरभूंय | प्रतिनिधी
-मंत्री गोविंद गावडे प्रस्तावाचेर सरकार करता विचार
पणजी: अनुसूचीत जमातींतल्या (एसटी) गरजू नागरिकांक सवाय दरांत घरां दिवपाचो प्रस्ताव राज्य सरकारच्या विचारांत आसा. फाटल्या कार्यकाळांत अादिवासी कल्याण खात्याच्या मंत्रीपदार आसतना गोविंद गावडे हांणी हो प्रस्ताव मांडिल्लो. ताचेर सरकारा कडल्यान विचार सुरू आशिल्ल्याची म्हायती सरकारी सुत्रांनी दिली.
हे विशीं मंत्री गोविंद गावडे हांचे कडेन संपर्क केल्यार, फाटल्या कार्यकाळांत आदिवासी कल्याण खात्याची जापसालदारकी आसतना आपूण हे विशींचो प्रस्ताव सरकारा मुखार मांडिल्ल्याचे तांणी मान्य केले. एसटी समुदाय हो गोंयांतलो मूळ भूंयपूत आसा. ह्या समाजा कडेन पयलीं मोट्या प्रमाणांत जमनी अाशिल्ल्यो. पूण कालांतरान त्यो भाटकारांच्या ताब्यांत गेल्यो. ताचो फटको फाटल्या जायत्या वर्सां पसून एसटी समुदायांतल्या हजारांनी नागरिकांक बसता. कांय जाणां कडेन जमीन ना. एकूच घर आसा. तांचीं कुटुंबां विस्तारत आसात. अशें परिस्थितींत जमीन विकत घेवन घर बांदप जायत्या जाणांक शक्य जायना. ते खातीर सरकारी जमनींत इमारती उब्यो करून थंयचे फ्लॅट गरजूंक सवाय दरांत दिवचे, असो प्रस्ताव आपूण सरकारा मुखार दवरिल्लो.
तशेंच इमारती उबारपा खातीर दोन सरकारी जमनींचीय म्हायती दिल्ली. हे विशीं आपूण मुख्यमंत्री डॉ. प्रमोद सावंत हांचे कडेन चर्चा केल्ली. आतां आदिवासी कल्याण खातें मुख्यमंत्र्यां कडेन आसा. ताका लागून हे विशीं तेच योग्य तो निर्णय घेतले, अशें मंत्री गावडे हांणी सांगलें.
एसटी समुदायाची लोकसंख्या व्हड आसा. विवीध कारणांक लागून ह्या समाजांतले जायते जाण अजुनूय गरीबींत आनी उदरगतीच्या मुख्य प्रवाहांत हाडपाचे ध्येय बाळगून मुख्यमंत्री डॉ. प्रमोद सावंत हांच्या फुडारपणा खाला राज्य सरकार काम करता. ते खातीर मुख्यमंत्री हे विशीं सकारात्मक निर्णय घेतले, असो विस्वास मंत्री गावडे हांणी उक्तायला.
जायत्या जाणांक मेळटलीं घरां
आत्मनिर्भर भारत – स्वयंपूर्ण गोंय’ मोहिमेंत मुख्यमंत्री डॉ. प्रमोद सावंत हांणी सर्वसामान्यांची उदरगत हेंच ध्येय दवरलां. ते नदरेन तांचे यत्न सुरू आसात.
येवजणे खाला राज्य सरकारान फाटल्या दोन वर्सांत अदिवासी समाजा खातीर नव्यो येवजण्यो अाखिल्ल्यो आसात. आदिवासींच्या उदरगतीं विशीं केंद्र सरकारच्यो चडांत चड येवजण्यो गोंयांत हाडून त्यो एसटी समुदाया मेरेन पावयतले.
एकूय गोंयकार नागरीक घरा पसून वंचीत रावचो ना हाची जतनाय आपूण हेता, हाची हमीय मुख्यमंत्री डॉ. प्रमोद सावंत हांणी जायते खेपे दिल्या. ते खातीर सवाय दरांत घर मेळपाचें सपन मुख्यमंत्र्या कडल्यान निश्चीत पुराय जातले, असो विस्वास एसटी समुदायांतले नागरीक बाळगून आशिल्ल्याची म्हायती एसटी संघटणेच्या एका पदाधिकाऱ्यान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
