भांगरभूंय | प्रतिनिधी
विजय सरदेसाय: सुविधा दिवपा बदला एसजीपीडीए सोदता कर वाडोवंक
मडगांव, प्रतिनिधी : एसजीपीडीएच्या किरकोळ नुस्तें मार्केटाची स्थिती सामकी बाबत जाल्या. सुविधा दिवपा बदला एसजीपीडीए कर वाडोवपाचो विचार करता. बुरशेपणांक लागून भलायकी समस्या निर्माण जावपाची भिरांत आसा. नितळसाणेचें काम पालिकेंचें. तेंय ते करिना. ताका लागून ठेकेदारा कडल्यान हें काम करतले आनी हो प्रस्न विधानसभेंत काडटले, अशी म्हायती गोवा फाॅरवर्ड अध्यक्ष, आमदार विजय सरदेसाय हांणी दिली.
सरदेसाय हांणी एसजीपीडीएच्या नुस्तें मार्केटाची पळोवणी केली. ह्या वेळार कोयराच्यो राशी पळोवपाक मेळ्ळ्यो.
नुस्तें मार्केट हें दुबय मार्केटावरीं उबारिल्लें. ह्या मार्केटांत कसलेच तरेच्यो सुविधा नुस्तें विक्रेत्यांक मेळनात. एसजीपीडीए कडल्या ह्या मार्केटांतल्या विक्रेत्यां कडल्यान कर एकठांय करतात, मात तांकां गरजेच्यो सुविधा हांगा नात. कोयराचो प्रस्नूय आसा. मार्केटाचे आशिकुशीक व्हडा प्रमाणांत कोयर उडयला, कांय जाणांनी शेतांनीय उडयला. नितळसाण नाशिल्ल्यान ही परिस्थिती विक्रेते, गिरायकां खातीरूय भलायकेची समस्या निर्माण करपी आसा. फातोड्डेंच्या ठेकेदारांनी मार्केटा भितर आनी भायले वटेन नितळ करून घेतले. आतां बांदकाम खातें हें काम करतलें. हो प्रस्न विधानसभा अधिवेशनांत काडटले, अशें तांणी सांगलें.
एसजीपीडीए कडल्यान ह्या मार्केटांतल्यान विक्रेत्यां कडल्यान घेवपी १० रुपयांचो कर १०० रुपया करपाक सोदता. कर वाडोवपाचो आसल्यार ते खातीर सुविधा मेळपाची गरज आसा. आदीं बरी सेवा दिवन उणो कर घेताले. आता नुस्तें विक्रेत्यांक कसलीच सुविधा आनी सुरक्षितताय मेळना. ठोक नुस्तें मार्केटांनी खुबशे सुवातेर किरकोळ नुस्तें विक्री जाल्यान किरकोळ नुस्तें मार्केटांत येवप्यांचो आंकडो उणो जाला, अशें सरदेसाय हांणी सांगलें.
पालिका वाठारांत नितळसाण राखपाचें मडगांव पालिकेचें काम. मात, तांचेकडेन कर्मचारी ना. आसल्यारूय ते थारावीक लोकांकूच दितात. फातोड्ड्यां नितळसाणे खातीर कामगारूच मेळनात अशी स्थिती आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
