एलेक्झेंडर झ्वेरेव निमाण्या चारांनी

भांगरभूंय | प्रतिनिधी

जर्मनीचो ऑलिम्पीक चॅम्पियन एलेक्झेंडर झ्वेरव हाणें फ्रॅंच ओपनाचे सेमी फायनलींत सुवात मेळयली. ताणें काल जाल्ले क्वॉर्टरफायनलींत अर्जेंटिनाच्या 22व्या सिडा वयल्या टॉमस मार्टिन एचेवेरीक 6-4, 3-6, 6-3 आनी 6-4 अशा चार सेटांनी हारयलो. तो सेगीत तिसरे खेपे सर्तीचे फायनलींत पावला. जाल्यार वट्ट सवे खेपे निमाण्या चारांनी सुवात मेळयली.

पोरूं सेमी फायनलींत स्पेनाच्या राफायल नादाला आड खेळटना तो जखमी जाल्लो. ताका लागून झ्वेरेवाक मॅच अर्दकुटी सोडची पडिल्ली. झ्वेरेव आतां सेमी फायनलींत नॉर्वेच्या कॅस्पर रुडा आड खेळटलो.

मजगतीं, सर्वियाच्या नोवाक जोकोविचान रशियेच्या करेन खाचानोवाक हारोवन निमाण्या चारांतली सुवात निश्चीत केली. ह्या जैता सयत जोकोविच आपले कारकिर्दींत 45वे खेपे सेमी फायनलींत पावलो. रशियेच्या खेळगड्यान जोकोविचाक खर आव्हान दिलें. खाचानोवान पयलो सेट 6-4 फरकान जिखलो. पूण, उपरांत जोकोविचान आपलो सगलो अणभव पणाक लावन फुडले तीन सेट 7-6, 6-2 आनी 6-4 अशा फरकान जिखून फुडले फेरयेंत सुवात मेळयली.