भांगरभूंय | प्रतिनिधी
आम आदमी पक्षाचो आरोप
पणजीः कर्मचारी भरती आयोगान सरकारी नोकर भरती ‘अणभव प्रमाणपत्र’ सक्तीचें केल्ल्यान तरणाट्यांचेर अन्याय जाला. एलडीसी, स्टेनोग्राफर एमटीएस हीं मुळावीं पदां आनी ह्या पदां खातीर अणभवाची गरज ना. पूण सरकाराचे हे अटीक लागून खुपश्या भुरग्यांक ही संद मेळना. सराकारान हे अटीचेर फेरविचार करून नव्या भुरग्यांक न्याय दिवपाक जाय, अशें आम आदमी पक्षान मागलां.
शेनवारा आम आदमी पक्षान पत्रकार परिशद आफयल्ली. ह्या वेळार आपाचे फुडारी रामराव वाघ, वाल्मिकी नायक आनी हेर फुडारी हजर आशिल्ले. पत्रकारां कडेन उलयतना रामराव वाघ हांणी सांगलें, कथीत नोकर भरती घोटाळ्याचो जेन्ना विशय चलतालो तेन्ना आपान गोंय नोकर भरती आयोगांत २ हजार रितीं पदां भरूंकनात म्हण आवाज काडिल्लो. उपरांत २१ नोव्हेंबराक एलडीसी, एमटीएस आनी स्टेनोग्राफर हे पोस्ट उजवाडाक हाडले आनी शुक्रारा हे पदांक अर्ज करपाची निमणी तारीख आशिल्ली.
हातूंत एलडीसी, ज्युनियर स्टेनोग्राफर एन्ट्री लेव्हल पदां ७ वो वित्त आयोगाच्या पांवडो २ खाला येतात आनी ताचे सकयल एमटीएस हें पद येता. हीं तिनूय पदां खातीर अणभवाची गरज ना. आमी ३० हजार अर्ज हे खातीर अपेक्षीत केल्ले. पूण आयलेच १० हजार. हाचो अर्थ जांणी हालींच १२ वी पास केल्या तांणी ‘अणभवाचो दाखलो’ हे अटीक लागून ते अर्ज भरपाक पावूंक ना, असो युक्तीवाद वाघ हांणी केलो.
जेन्ना जायरात काडली तेन्ना गरजेची पात्रताय म्हण १२ वी पास शिक्षणीक पात्रताय, दुसरें कोंकणी गिन्यान, तिसरें टायपींग स्पीड आनी चवथी अट एक वर्साचो अणभव म्हूण घाल्या. पूण देशभरांत फकत भाशेचें गिन्यान आनी शिक्षणीक पात्रताय ह्यो दोनूच अटी आसात. स्टेनो, एमटीएस हांचे नियुक्ती कायदे सरकारान फाटले वर्सा हळूच बदल्ल्यात, हें आतां आमच्या लक्षांत आयलां, असो आरोप वाघ हांणी केला.
हे जे कायदे आसात ते पात्र उमेदवारांक. हे नोकरे खातीर अर्ज करपाक परावृत्त करतात. हे नोकरभरती कायदे गोंयकारांच्या हितांत ना आनी सरकरान ताचेर फेरविचार करपाक जाय. जांणी एप्रेन्टींशीप आनी पयली नोकर्यो केल्यात तांकां अदीक गूण दियात. मात नव्या भुरग्यांक अर्ज करपाक दिवपच ना हो तांचेर व्हड अन्याय, अशी मागणी वाघ हांणी केल्या.
महाराष्ट्रातल्या भुरग्यांची नोकर भरती गोंयच्या टपाल खात्यांन केल्ल्यान गोंयच्या टरणाट्यांचेर अन्याय जाला, अशें वाल्मिकी नायक हांणी सांगलें.
भारतीय टपाल खात्यान गोंयांत महाराष्ट्रांतले लोक हाडून भरल्यात. टपाल खात्यांत थळाव्यांची बुद्धीमता जाय पडटा. तांकां गोंयांतल्या गांवांची म्हायती आसप गरजेचें. त्या जाग्यार गोंयकार सोडून महाराष्ट्राचे लोक हाडून नोकर्यो भरपात अर्थ ना. सरकारान हे फाटलो अपलो हेतू स्पश्ट करचो. तुमकां गोंय, गोंयकार नाका काय? असो प्रस्न वाल्मिकी हांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
