एरीयल बंच्ड केबल कंत्राटाची चवकशी जावपाक जाय: संकल्प आमोणकार

भांगरभूंय | प्रतिनिधी

सभाघर समिती वा दक्षता खात्या वतीन चवकशेची मागणी

पणजी : एरीयल बंच्ड केबल (एबीसी) यंत्रणेचेर 145 कोटी रूपया खर्च जाल्या. ही यंत्रणा अपेशी थारल्या. एबीसी कंत्राटाची चवकशी करपाची मागणी आमदार संकल्प आमोणकार हांणी केली. सभाघर समिती वा दक्षता खात्या वतीन चवकशी जावपाक जाय, अशें संकल्प आमोणकार हांणी म्हणलें.

बिरेस्तारा सभाघरांत वीज खात्याच्या मागण्यांचेर चर्चा जाली. ह्या वेळार उलयतना संकल्प आमोणकार हांणी ही मागणी केली.

चिजेच्या आपालिपा विशींची कागाळ नोंद करपा खातीर 1912 हो हेल्पलायन नंबर आसा. हो हेल्पलायन नंबर बरेच खेपो चलना. एकूच 1912 नंबरा बदला म्हाल वा विभागा खातीर वेगळे हेल्पलायन नंबर आसपाची मागणी आमदार कार्लोस फेरेरा हांणी केली. तशेंच वोल्टेज फ्लक्चुएशनाचे प्रमाण वाडत आसा. वोल्टेज फ्लक्चुएशनाचेर नियंत्रण दवरपाची गरज तांणी उक्तायली.

आमदार संकल्प आमोणकार हांणी वीज दुरुस्ती खातीर मोबायल व्हॅनींचो आंकडो वाडोवपाची मागणी केली. लायनमनाक शूज, ग्लोज तशेंच सुरक्षेचे सामान दिवपाक जाय, अशें तांणी सांगलें.

सांवड्डें मतदारसंघांत सांगें, कुडचडें आनी फोंडें सबस्टेशनांतल्यान वीज पुरवण जाता. सगल्यो 33 केव्ही लायनी पोरण्यो जाल्यात. 33 केव्ही लायनी नव्यो घालपाची मागणी आमदार गणेश गांवकार हांणी केली.

पावसांत झाडां तशेंच खांदयो पडून विजेच्यो वायरी तुट्टात. गिमांत लोकांनी खांदयो मारपाक वीज खात्याक सहकार्य करपाक जाय. पोरण्यो विजेच्याे वायरी बदलपाक जाय, अशी मागणी आमदार डिलायला लोबो हांणी केली.

सौर उर्जा निर्मितीक उर्बा जाय: मायकल लोबो

सोलर पॅनल बसोवन सौर उर्जा निर्मिती सुरू जावपाक जाय. फुडाराक विजेचो उणाव जावपाक जायना, म्हूण सौर उर्जे बगर हेर पर्याय ना. पर्रा एकाच दिसा 30 खेपे लायट गेली. पर्राच न्हय पुराय गोंयांत विजेचो आपालिपा सुरू आसा. सुरळीत वीज पुरवण जावपा खातीर ट्रान्सफॉर्मरा वेल्या लोडाची तपासणी जावपाची गरज आसा, अशें मायकल लोबो हांणी सांगलें.

पर्यें मतदारसंघांत झाडाक लागून वीज पुरवण खंडीत जावपाचे प्रमाण चड आसा. हें प्रमाण उणें करपा खातीर 33 केव्ही लायनी भुंयगत करपाची गरज आसा, अशें देविया राणे हांणी सांगलें.

कुंमारजुंवें मतदारसंघांत 3 लाख चौखण मिटर जागो पडींग आसा. ह्या जाग्याचेर सौर उर्जा निर्मिती प्रकल्प उबारप शक्य आसा. हाचो वीज मंत्र्यांनी विचार करचो, अशी मागणी आमदार राजेश फळदेसाय हांणी केली.

केपें मतदारसंघातली वीज पुरवण सुरळीत जावपा खातीर बाळ्ळी तशेंच बेतूल हांगा सबस्टेशन जावपाची गरज आसा. सबस्टेशना सयत सेक्शन ऑफीस सुद्दा जावपाक जाय, अशी मागणी केपेंचे आमदार एल्टन डिकोस्टा हांणी केली.