भांगरभूंय | प्रतिनिधी
एमआय केपटावनान 19 सप्टेंबराक केपटावनांत जावपी एसए 20 खातीरच्या खेळगड्यांचे पावणे पयलीं प्रशिक्षक संघाची घोशणा केल्या. एसए 20 ही द. आफ्रिकेंतली मुखेल टी – 20 क्रिकेट लीग.
ऑस्ट्रेलियाचो आदलो बॅट्समॅन सायमन कॅटिच मुख्य प्रशिक्षकपदाची जबाबदारी स्विकारतलो, तर दक्षिण आफ्रिकेचो दिग्गज खेळगडो हाशिम आमला बॅट्समॅन प्रशिक्षक म्हणून संघात वांटेकार जातलो. आमलाच्या नांवाचेर सगल्यांत वेगवान 2000, 3000, 4000, 5000 आनी 6000 वनडे धांवड्यो करपाचो विक्रम आसा.न्यूझीलंडाचो आदलो बॅट्समॅन जेम्स पेमेंट फिल्डींग प्रशिक्षक म्हणून जबाबदारी स्विकारतलो. दक्षीण आफ्रिकेचो आदलो खेळगडो रॉबिन पीटरसन संघाचे सरव्यवस्थापक आसतले. आकाश एम. अंबानी, (चेअरमन, रिलायन्स जिओ इन्फोकॉम लिमिटेड) हांणी सांगलें, “एमआय केप टाउन कोचिंग टीमींत सायमन आनी हाशिमाक येवकार. जेम्स आनी रॉबिना वांगडा आमी एक संघ तयार करूं, जो दक्षिण आफ्रिकेंत क्रमांक एकचेर येतलो. क्रिकेटीचो एमआय ब्रँड विकसित करतलो आनी हांगा एमआय मुल्यां मुखार व्हरतलो.”
एमआय केप टाऊनान हाचे पयलीं कागिसो रबाडा, डेवाल्ड ब्रेविस, रशीद खान, सॅम कुरन आनी लियाम लिव्हिंगस्टोन ह्या पांच खेळगड्यांक करारबद्ध केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
