भांगरभूंय | प्रतिनिधी
इंडियन सुपर लिगेच्या (आयएसएल) अंदूंच्या हंगामाच्या पयल्या स मॅचींनी एकूय हार घेवंक नाशिल्लो एफसी गोवा आयज घरच्या मैदानाचेर केरळा ब्लास्टर्सा आड खेळटलो. मॅच फातोड्डेंच्या जवाहरलाल नेहरू स्टेडियमाचेर जातली.
एफसी गोवा स मॅचींतल्यान 16 गुणां सयत गुणतकट्यांत दुसरे सुवातेर आसा. जाल्यार केरळा ब्लास्टर्स 8 मॅचींतल्यान 17 गुणां सयत पयले सुवातेर आसा. दोनूय क्लबांनी अंदूंच्या हंगामांत अजून मेरेन उत्कृश्ट केल्ल्यान आयची मॅच उमळशीक वाडोवपी थारुये. नोव्हेंबरांत आंतरराष्ट्रीय ब्रेक घेतल्या उपरांत आयएसएलान वेग घेतला. दोनूय पंगडां खातीर आपल्या प्रदर्शनांत सातत्य राखपाचें आव्हान आसतलें.
काल जाल्ले पत्रकार परिशदेंत पत्रकारां कडेन उलयतना एफसी गोवाचो मुखेल प्रशिक्षक मॅनोलो मार्केझ हाणें केरळा ब्लास्टर्सा आडचे मॅची विशीं भुमिका स्पश्ट केली.
आमी हंगामाक उत्कृश्ट सुरवात केल्या. फाटले मॅचींत गोल करपाच्यो साबार संदी तयार केल्ल्यो. अपेक्षे परस बेगीन खेळ सोंपोवपाची संद मेळ्ळी आनी तातूंत आमकां येस आयलें. आमी आमची स्थिती कायम राखीत बदली खेळगड्यांचे बाबतींत लेगीत मैदानांत बरें प्रदर्शन केलां अशें ताणें मुखार म्हणलें.
आमकां केरळा ब्लास्टर्सा आड खेळटना खंयच्या आव्हानांक तोंड दिवपाक जाय हाची लेगीत खबर आसा. तांचे कडेन उत्कृश्ट खेळगडे आसात. तांकां उणें लेखप आमकां चलचें ना अशें मार्केझान मुखार म्हणलें.
केरळा ब्लास्टर्स आमचे परस चड मॅची खेळ्ळा. कांय वेळार तांचे मुखेल खेळगडे उपलब्ध नाशिल्ले. तरी लेगीत गुणतकट्यांतली पयली सुवात कायम राखली. ताका लागून आयची मॅच आमचे खातीर तितली सोंपी आसची ना. आयएसएलांतली दरेक मॅच आव्हानात्मक आसता आनी कठीण मॅचीं खातीर सज्ज आसात. एफसी गोवा गुणतकट्यांत दुसरे सुवातेर आसा. हे विशीं लेगीत ताणें भाश्य केलें. लीग मॅची सोंपतल्यो त्या वेळार आमी खंयचे सुवातेर आसतले. हें आतांच सांगप कठीण आसा. कांय पंगड आठ जाल्यार कांय पंगड चार मॅची खेळ्ळ्यात. हो व्हड फरक आसा. घडये ह्या म्हयन्याचे अखेरेक ज्या वेळार सगले पंगड दरेकी 10-12 मॅची खेळटले त्या वेळार आमच्या मुखार एक चित्र स्पश्ट आसतले अशें ताणें मुखार म्हणलें.
एफसी गोवान अजून मेरेन बरें प्रदर्शन केलां. सतल्यो पांच मॅची ताणें जिखल्यात, जाल्यार एक मॅच बादाबाद उरल्या.
दोनूय पंगडांन अजून मेरेन बचावात्मक आनी आक्रमक खेळ केला. विशेश करून एफसी गोवान तीन मॅचींनी एकूय गोल घेवंक ना. तशेंच गोल करपाच्यो संदी तयार करपाक लेगीत एफसी गोवा मुखार आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
