भांगरभूंय | प्रतिनिधी
एफसी गोवान नावेलीच्या रोझरी म्हाविद्यालयाच्या मैदानाचेर जाल्ले मॅचींत धेंपो क्लबाक 4-3 अशा गोल फरकांनी हारोवन ड्रीम स्पोर्ट्स चॅम्पियनशिपीची गोवा लेग जिखली. ह्या जैताक लागून एफसी गोवान ड्रीम स्पोर्ट्स चॅम्पियनशिपीचे राष्ट्रीय निमाणे फेरयेंतली आपली सुवात निश्चीत केली.
हे मॅची पयलीं धेंपो स्पोर्ट्स क्लबान अ गटांत आपलो शेक दवरिल्लो. ताणें दोनूय सांखळी मॅची जिखून फायनलींत सुवात मेळयिल्ली. जाल्यार ब गटांत एफसी गोवान निर्णायक पॅनल्टी शुटआवटांत बेळगांव युनायटेड फुटबॉल अकादमीक (बुफा) 6-5 असो हारोवन फायनलींतली सुवात निश्चीत केल्ली.
एफसी गोवा आनी धेंपो स्पोर्ट्स क्लब हांचे मदली फायनल सामकी उमळशीक वाडोवपी थारली. अखेरक मेरेन दोनूय क्लबांक एकामेका गोल करपाची कसलीच संद दिली ना. अखेरेक मॅच बादाबाद उरिल्ल्यान पॅनल्टी शुटआवटाचो आदार घेवचो पडलो.
एफसी गोवा वतीन टेटे, कॅलम फर्नांडीस, रोनीत कोरिया आनी रोहन फर्नांडीस हाणें गोल केले, जाल्यार धेंपो स्पोर्ट्स क्लबा वतीन जॉड्रिक अब्रांचेस, नॅश फर्नांडीस आनी अॅशॉन वाझ हाणें गोल केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
