भांगरभूंय | प्रतिनिधी
फॉर्मांत आशिल्ल्या एफसी गोवान हांगाच्या विवेकानंद युवा भारती क्रिडांगण स्टेडियमाचेर येजमान मोहन बगानाक 4-1 अशा फरकान हारोवन इंडियन सुपर लिगेंतलो (आयएसएल) आपलो सर्वोत्कृश्ट फॉर्म कायम राखलो.
पाचांतले चार गोल पयल्या अर्दांत पडले. तातूंतले तीन गोल अखेरच्या आठ मिनटांत पडले. घरच्या मैदानाचेर खेळटना मोहन बगानान 3-4-1-2 जाल्यार एफसी गोवान 4-2-31 अशा फॉर्मेशनान सुरवाती सावन खेळपाक पसंती दिल्ली.
फॉर्मांत आशिल्ल्या एफसी गोवान सुरवाती सावन आक्रमक रूप आपणायिल्लें. आठव्या मिनटाक कार्ल मॅकह्युगनान गोल क्षेत्राच्या मध्या वयल्यान घेतिल्ली हेडर येजमानाच्या बचाव फळयेन अचूक रितीन आडायली. ते उपरांत मोहन बगानाचो गोंदळील्ले स्थितीचो फायदो एफसी गोवाक घेवपाक जमलो ना. 10व्या मिनटाक पॅनल्टी क्षेत्रांत योग्य पद्दतीन क्लियर करूंक नाशिल्ल्यान रॅफ्रीन मोहन बगाना आड पॅनल्टी दिली. नोह सदाओईन येसस्वी रितीन बॉल जाळांत घालीत एफसी गोवाचें खातें उगडलें.
सुरवातीच्या आघाडीन एफसी गोवा मदीं आनंदाचें वातावरण पातळिल्लें. दुसरे वटेन येजमान खेळगडे आनी ताचे चाहते हुस्क्यांत दिसले. मोहन बगानाक 16व्या मिनटाक पॅनल्टी कॉर्नर मेळ्ळो. पूण, ते संदीचो गोलान रुपांतर करपाक ताका अपेस आयलें. एफसी गोवान आघाडी राखली तरी मध्यांतरा पयलीं आठ मिनटांनी वट्ट तीन गोलांची नोंद जाली. 42व्या मिनटाक कार्ल मॅकह्युगच्या पासाचेर व्हिक्टर रॉड्रिग्सान एफसी गोवाची आघाडी वाडयली. अतिरिक्त वेळांत नोह सदाओई परतून पंगडाचे मजतीक आयलो. ताणें आपलो दुसरो गोल करून स्कोर 3-0 असो केलो.
तीन गोलांनी पडिल्ल्या मोहन बगानाक अतिरिक्त वेळांत लय फावो जाली. दिमित्रओस पेट्राटोसान बॉलाचेर आपलो शेक दवरीत दावे वटेच्यान उत्कृश्ट गोल करून एफसी गोवाची आघाडी उणी केली. दुसऱ्या अर्दां एका गोलाची भर पडली. हो गोल कार्लोस मार्टिनेझान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
