भांगरभूंय | प्रतिनिधी
पणजीः गोंयांत रावपाची मुजत सोंपले उपरांत लेगीत बेकायदेशीर रितीन रावपी विदेशी नागरिकां आड विदेशी प्रभागीय नोंदणी कार्यालयाच्या (एफआरआरओ) (Foreigners Regional Registration Office) गोंय विभागान कारवाय केली. ह्या मे म्हयन्यांत आतां मेरेन 9 विदेशी नागरिकांक देशांतल्यान भायर धाडल्यात. मजगतीं, बिरेस्तारा मांद्र्यां केल्ल्या खाशेल्या कारवायेंत गोंयांत रावपाची मुजत सोंपतकच लेगीत बेकायदेशीर रितीन रावपी 7 विदेशी नागरिक मेळ्ळे.
मांद्र्यां केल्ल्या तपासणी मोहिमेत व्हिसा सोंपतकच लेगीत 5 रशियन, 1 युक्रेनियन आनी 1 दक्षीण आफ्रिकन नागरिक भारतांत रावतात अशें दिसून आयलें. संबंदितां आड गरजेची कायदेशीर कारवाय सुरू केल्या.
मे 2026 वर्सा देशांतल्यान धांवडावन घाल्ल्या 9 विदेशी नागरिकांत 5 युगांडाचे, 3 रशियन आनी 1 नायजेरियन हांचो आस्पाव आसा. हांच्या सगळ्यां आड दीर्घकाळ कायदेशीर आनी प्रशासकीय प्रक्रिया पुराय जाल्या. तांकां ब्लॅकलिस्ट करपाची प्रक्रियाय सुरू केल्या.
अंदूं आतां मेरेन 27 विदेशी नागरिकांचेर कारवाय
एफआरआरओच्या म्हायती प्रमाण, जानेवारी 2026 सावन आतां मेरेन गोंयांत रावपाचो काळ सोंपलो तरी बेकायदेशीर रितीन रावपी वेगवेगळ्या देशांतल्या 27 विदेशी नागरिकांक धांवडावन घाल्यात. 2025 वर्सा 120 परस चड विदेशी नागरिकांचेर कारवाय केल्ली. हातूंत 29 बांगलादेशी नागरिकांचो आस्पाव आशिल्लो.
मजगतीं, एफआरआरओन गोंयांतले हॉटेल धनी, गेस्ट हावस ऑपरेटर, होमस्टे सेवा पुरवणदार, मुंडकार आनी हेर रावपाची सुविधा दिवप्यांक विदेशी नागरिकांची म्हायती वेळार आनी अचूक रितीन सी-फॉर्म/फॉर्म 3 (C-Form/Form III) वरवीं सादर करपाचो उलो मारला. तशेंच म्हायती सादर करपाक कळाव वा आडनदर केल्यार कायदेशीर कारवाय जावंक शकता अशी शिटकावणी एफआरआरओन दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
