भांगरभूंय | प्रतिनिधी
12 वर्सांचें येस मुख्यमंत्र्यान केलें सादर
नक्षलवाद, आतंकवाद सोंपयिल्ल्याचो दावो
70 लाख कोटींची थेट विदेशी गुंतवणूक
भांगरभूंय । प्रतिनिधी
पणजी : आखाती झूज आनी हेर कांय गजालींक लागून पेत्रोल, डिझॅलाचो दर वाडल्यात तरी लेगीत आयकरांत सूट मेळपाचे येणावळींत वाड तशेंच हेर सवलती सामान्यांक सरकारान दिल्या. देशहिता खातीर ह्या देशांत ‘दो विधान, दो निशान आनी दो प्रधान’ आसप योग्य नाशिल्लें. हाचे खातीर प्रधानमंत्री नरेंद्र मोदी हांणी 370 कलम रद्द करून जम्मू काश्मीराक भारताच्या मुखेल प्रवाहांत हाडलें. देशांतलो नक्षलवाद आनी आतंकवाद लेगीत तांणी सोंपयलो. तशेंच राम मंदिराची उबारणी करून कोटींनी जनतेचें सपन पुराय केलें, अशें मुख्यमंत्री डॉ. प्रमोद सावंत हांणी सांगलें.
प्रधानमंत्री नरेंद्र मोदी हांच्या फुडारपणा खाला सरकाराक 12 वर्सां पुराय जालीं. दिल्लींत जाल्ले परिशदेक हाजेरी लायले उपरांत मुख्यमंत्री डॉ. सावंत हांणी शुक्रारा गोंयांत येतकच पत्रकार परिशद घेतली. उदका पुरवण मंत्री सुभाष शिरोडकार, वीज मंत्री सुदिन ढवळीकार आनी येरादारी मंत्री मॉविन गुदिन्हो ह्या वेळार हाजीर आशिल्ले.
केंद्र सरकारान फाटल्या 12 वर्सांत देशांत चालीक लायिल्लीं उदरगतीचीं कामां तशेंच विवीध कल्याणकारी येवजण्यांचें येस मुख्यमंत्र्यान सादर केली. फाटल्या 12 वर्सांत देशांत 70 लाख कोटींची थेट विदेशी गुंतवणूक (एफडीआय) जाल्या. विमानतळांचो आंकडो दुपेटीन वाडून वैजकी म्हाविद्यालयांचो आंकडो 842 वयल्यान 2100 चेर पावला. 2004 ते 2014 मेरेन गोंयाक 2076 कोटींचो निधी शुल्काच्या रूपांत मेळिल्लो. फाटल्या 12 वर्सांत 11812 कोटींचो निधी शुल्काच्या रूपांत गोंयाक मेळ्ळा.
‘प्रधानमंत्र्यांची म्हान तीन कामां’
370 कलम रद्द करून अखंड भारताचें सपन साकार करप, देश दहशतवाद आनी नक्षलवाद मुक्त करप आनी राम मंदिराचें सपन साकार करप हें प्रधानमंत्री नरेंद्र मोदी हांच्या कार्यकाळांतलीं तीन म्हान कामां आसा. एनडीएच्या फाटल्या 12 वर्सांच्या काळांत गोंयची लेगीत बरीच उदरगत जावपा सयत गोंयकारांकूय लेगीत बरोच लाव जालो, अशें मुख्यमंत्री डॉ. प्रमोद सावंत हांणी सांगलें.
गोंयांक जाल्लो लाव
– 299 किमी म्हामार्गा खातीर 999 कोटींचो निधी
– मोपा लिंक रोड – 1183 कोटी
– 24 किमी रेल्वे लायनीचें विद्युतीकरण
– मडगांव- मंगळूर आनी मडगांव- मुंबय वंदे भारत रेल्वे
– अमृत येवजणे खाला मडगांव, सावड्डें, वास्को रेल्वे स्टेशनाची उदरगत
– मनोहर (मोपा) विमानतळाची उबारणी, 2870 कोटी
– पर्यटना खातीर स्वदेश येवजणे खाला 197 कोटींचो निधी
– पीएम जनधन येवजणे खाला 2.27 हजार बँक खातीं
– मुद्रा येवजणे खाला 5.78 कोटींचें रीण
– पीएम स्वनिधी येवजणे खाला 3 हजार जाणांक लाव
– पीएम सुरक्षा विमो येवजणे खातीर 8 लाख नोंदणी
– पीएम जीवनज्योती येवजणे खातीर 4 लाख नोंदणी
– अटल पेन्शन येवजणे खातीर 1 लाख 18 हजार नोंदणी
– पीएम गरीब कल्याण येवजणेचे 5 लाख लाभार्थी
– किसान क्रेडीट कार्डा खातीर 25 हजार नोंदणी
– 915 हॅक्टर शेत जमीन ओलसाणी खाला
– पीएम फसल विमो येवजणेचो 5892 जाणांक लाव
– मत्स्य संपदा येवजणे खाला 126 कोटींचो निधी
– नुस्तेमारी खातीर 11.24 कोटी मुळाव्यो सुविधा
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
