भांगरभूंय | प्रतिनिधी
मुख्यमंत्र्यांनी बसके वरवीं घेतलो एनईपीचो नियाळ
पणजी, प्रतिनिधी : फुडल्या वर्सा सावन ज्या यत्तांक राष्ट्रीय शिक्षण धोरण (एनईपी) लागू जातलें, त्या यत्तांचो अभ्यासक्रम तयार करपाची प्रक्रिया सुरू जाल्या. एनईपी कार्यवाये विशीं विद्यालयांच्यो समस्या सुटाव्यो करपा खातीर म्हाल पावंड्याचेर अधिकारी भेटी दितले.
राष्ट्रीय शिक्षण धोरणाच्या कार्यवायेचो नियाळ घेवपा खातीर मुख्यमंत्री डॉ. प्रमोद सावंत हांणी सुकाणू समितीची बसका घेतली. हे बसके उपरांत पत्रका वरवीं तांणी निर्णयांची म्हायती दिली.
फावंडेशन पावंड्या सयत अंदूं पांचवी तशेंच णवेचे यत्ते खातीर एनईपीची कार्यवाय सुरू जाल्या. फुडल्या वर्सा सव्वी तशेंच धावे खातीर एनईपी लागू जातली. फावंडेशन पावंड्यावेलो अभ्यासक्रम तयार जावन तो सगळ्या शाळां मेरेन पावयला. कला शिक्षणा खातीर कला आनी वेवसायीक शिक्षकांक फावो तें प्रशिक्षण दिलां. णवेच्या शिक्षकांक शिकोवपा सयत पेपर तपासणी विशींचें खासा प्रशिक्षण दिलां. गणित आनी विज्ञान शिक्षकांक आयआयएससी बंगळुरूंत प्रशिक्षण दिलां.
पारख सर्वेक्षणा खातीर फाल्यां चांचणी
विद्यार्थ्यांचे पारख राष्ट्रीय सर्वेक्षण १९ नोव्हेंबर २०२४ दिसा जावपाचें आसा. हाचे तयारे खातीरची चांचणी फाल्यां ४ सप्टेंबराक राज्यांतल्या सगळ्या विद्यालयांनी जातली. तिसरी, सवी आनी णववेच्या विद्यार्थ्यां खातीर ही चांचणी जातली. विद्या समीक्षा केद्रा वरवीं विद्यालयांक चांचणे खातीरचे प्रस्न मेळटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
