भांगरभूंय | प्रतिनिधी
मडगांव: कोंकण रेल्वेच्या मान्यतायप्राप्त युनियना खातीर 8 आनी 9 ऑक्टोबर दिसा वेंचणुको जाल्यो. हातूंत 4796 जाणांनी मतदान केलें. कोंकण रेल्वे कॉर्पोरेशन एम्प्लॉय युनियनाक (केआरसीई) 2211 मतां जाल्यार नॅशनल रेल्वे मजदूर युनियनाक (एनआरएमयू) 2553 मतां मेळ्ळीं. केआरसीईक 342 मतांनी हारोवन एनआरएमयून जैत मेळयलें.
कोंकण रेल्वेच्या मान्यतायप्राप्त युनियनाचे निवडी खातीर दर दोन वर्सांनी वेंचणुको घेतात. 8 आनी 9 ऑक्टोबराक वेंचणुके खातीर मतदान जालें. कोंकण रेल्वे कॉर्पोरेशन लिमिटेडांत 5249 रेल्वे कर्मचारी आसात. हातूंतले 4894 कर्मचाऱ्यांची नोंद मतदार वळेरेंत आसा. तातूंतले 4796 मतदारांनी मतदान प्रक्रियेंत वांटो घेतलो.
हातूंत कोंकण रेल्वे कॉर्पोरेशन एम्प्लॉय युनियनाक 2211 इतलीं मतां पडलीं. 32 मतां अवैध थारलीं. जाल्यार नॅशनल मजदूर युनियनान कोंकण रेल्वे कॉर्पोरेशन युनियना परस 342 मतां चड मेळोवन वेंचणूक जिखली. हे वेंचणुकेंत वेंचणूक अधिकारी म्हूण संजय दाबी हांणी काम पळयलें. उपरांत कोंकण रेल्वे अकादमी कडेन जमिल्ल्या रेल्वे कर्मचाऱ्यांनी मडगांव रेल्वे स्टेशना मेरेन मिरवणूक काडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
