‘एनआयटी’ केंद्राचेर ‘नीट’ पुनर्परिक्षा दिवपाक आयिल्ल्यांचो बोवाळ

भांगरभूंय | प्रतिनिधी

मडगांव : ‘नॅशनल टेस्टिंग एजन्सी’च्या (एनटीए) भेसळ कामाक लागून दक्षीण गोंयच्या कुंकळ्ळेच्या ‘एनआयटी’ केंद्राचेर ‘नीट’ पुनर्परीक्षा दिवपा खातीर आयिल्ल्या विद्यार्थ्यांचो आनी पालकांचो बरोच बोवाळ जालो. विद्यार्थ्यांक मोबायलार धाडिल्ले मॅसेजींत परिक्षा केंद्र ‘फोंडें’ दाखयिल्लें, जाल्यार प्रत्यक्ष प्रवेशपत्राचेर ‘कुंकळ्ळी’ नमूद केल्ल्यान वेळार धांवपळ जाली; तशेंच केंद्रावेल्या अपुर्ण सुविधा आनी प्रशासनाच्या नियोजनाच्या उणावाक लागून पालकांक बरोच मनस्ताप सोंसचो पडलो.
सांखळेचे पालक आत्माराम देसाय हांणी ह्या बोवाळाची म्हायती दिली. विद्यार्थ्यांनी पर्याय निवडतना घरा लागसार आशिल्ल्या ‘फोंडें’ केंद्राची निवड केल्ली. चार दिसां आदीं ‘एनटीए’कडल्यान आयिल्ले व्हॉट्सऍप मॅसेजींत परिक्षा केंद्र ‘एनआयटी फर्मागुढी, फोंडें’ अशें दाखयिल्लें. मात, प्रत्यक्षांत फोंडेंची ‘एनआयटी’ बंद जाल्ल्यान ती कुंकळ्ळ्यां स्थलांतरीत जाल्या. प्रवेशपत्रांचेर ‘कुंकळ्ळी’ जाल्यार मॅसेजींत ‘फोंडें’ बरयिल्ल्यान भ्रम वाडलो. हे विशीं ‘एनआयटी’ कडेन संपर्क केलो तेन्ना कसलोच प्रतिसाद मेळूंक ना. हाका लागून कांय पालकांनी सकाळीं पयलीं फर्मागुढी गेले आनी थंयच्या कुटळ्ळ्यां धांव घेतली, अशें आत्माराम देसाय हांणी सांगलें.
धावी आनी बारावेच्या परिक्षा प्रमाण जिल्लो प्रशासनान प्रसारमाध्यमांतल्यान परिक्षा केंद्रांची म्हायती जाहीर करप गरजेचें आशिल्लें. प्रशासनान विद्यार्थ्यां खातीर बसीची वेवस्था केल्ली, मात तांचे मार्ग आनी वेळापत्रक दिवंक नाशिल्लें. सांखळेच्यान वचपा खातीर खंयची बस आसा, हाची म्हायती पालकांक नाशिल्ली. केंद्राचेर आयिल्ली एक सरकारी बस पुरायेन रिकामी आशिल्ली आनी तिची अवस्था पळयल्यार ती वाटेरूच बंद पडपाचो भंय आशिल्लो, अशेंय सांगलें.
मजगतीं, विद्यार्थ्यांक सकाळीं ११ वरांचेर परिक्षा केंद्रांत प्रवेश दिलो. परीक्षा दनपरां २ वरांचेर सुरू जावन सवाय पांचांक सोंपपाची आशिल्ली. ह्या काळांत भुरग्यांची भितर खावपा-पिवपाची वेवस्था जाल्ली काय ना वा तीं हॉलांत सुरक्षीत पावल्यांत काय नात ही कसलीच म्हायती भायर तात्काळत राविल्ल्या पालकांक मेळनाशिल्ली. पालकांक भितर वचपाक मनाय आशिल्ल्यान भर वतांत तांकां चिंतेंत वेळ काडचो पडलो, अशें आत्माराम देसाय हांणी स्पश्ट केलें.