भांगरभूंय | प्रतिनिधी
भारताचो बॅडमिंटन खेळगडो एच एस प्रणय मलेशिया मास्टर्साचे फायनलींत सुवात मेळयली. ताचो प्रतीस्पर्धी इंडोनेशियाच्या क्रिस्तियन एडिनाटान धोंपराचे दुखापतीक लागून सेमी फायनल अर्दकुटी सोडपाचो निर्णय घेतलो आनी ताका लागून प्रणयाक फुडली चाल मेळ्ळी.
मॅच अर्दकुटी सोडली त्या वेळार संवसारीक क्रमवारींत णववे सुवातेर आशिल्लो प्रणय 19-17 असो मुखार आशिल्लो.
संवसारीक ज्युनियर वस्तादपण 2019चो जैतिवंत एडिनाटाक प्रणय आनी इंडोनेशियाच्या कोचान सांबाळ्ळो. ते उपरांत ताका कोर्टा वयल्यान भायर व्हेलो.
प्रणय आतां चीनाच्या वेंग होंग यांग आनी चीनी तायपेच्या लिन चून यी हांच्या मदल्या जैतिवंता आड खेळटलो.
मजगतीं, दोन खेपेची ऑलिम्पीक पदक जैतिवंत पी व्ही सिंधूक हिका बायलांच्या एकोड्या गटांतले सेमी फायनलींत इंडोनेशियाचे ग्रेगोरिया मरिस्का टी कडल्यान 14-21, 17-21 अशा फरकान हार घेवची पडली.
ग्रेगोरिया आड सात मॅची जिखल्या उपरांत सिंधूची ही सेगीत दुसरी हार थारली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
