भांगरभूंय | प्रतिनिधी
इलेकट्रॉनीक इंजिनीयर जावपाची दवरली मोख
पणजीः 14 वर्सा पिरायचो दिव्यांग भुरगो ज्योशुआ डिक्रुझ हाणें आपले परिस्थितीचेर मात करून 10 वीचे एसएससी परिक्षेंत व्हड येस मेळयलां. ज्योशुआ हो दोनूय पांय आनी एक हात नासतना जल्माक आयल्लो. अंदूंचे 10 वीचे परिक्षेंत ताणें 82.8 टक्के इतले गूण मेळोवन एक नामना जोडल्या. फुडाराक
इलेक्ट्रॉनीक इंजिनयर जावपाची मोख ज्योशुआन दवरल्या.
ताचे येस लोकां मुखार उजावाडा येवचें म्हूण गोंय दिव्यांग हक्क संघटणेन (ड्रेग) हांणी पत्रकार परिशद आयोजीत केल्ली. पत्रकार परिशदे वेळार ज्योशुआ ताचो पाय ज्योनी डिक्रुझ, मांय बबिता डिक्रुझ आनी ड्रेगाचे आवेलीनो डिसा हजर आशिल्ले.
ज्योशुआ हाची वळख दितना ड्रेगाचे आवेलीनो डिसा हांणी सांगलें, ज्योशुआ हो 15 वर्सा पयलीं एक हात आनी दोनूय पांय नासतना जल्माक आयिल्लो. जेन्ना तो पोटांत आशिल्लो तेन्ना दोतोरांनी ताच्या पालकांक सांगलें की तुमचो भुरगो असामान्य जल्माक येतलो आनी तांकां गर्भपात करपाचो सल्लो दिल्लो. पूण तांणी तो सल्लो आयकूंक ना. दिव्यांग भुरगो जर जल्माक येता तेन्ना दोतोरांनी असो सल्लो दिवप ही धक्को दिवपी गजाल. ताचे कामगिरीक लागून ज्योशुआ हो सगल्या दिव्यांगा खातीर प्रेरणा जावन आसा, अशे आवेलीनो हांणी सांगलें.
आपले कामगिरी विशीं उलयतना ज्योशुआन सांगले, हें येस संपादन करपा खातीर म्हाका म्हजी शाळा आनी इश्टां कडल्यान खूब तेंको मेळ्ळो. शाळेन म्हाक शिकयलें. पूण 10 वेंत पास करप आनी जिणेंत फुडे व्हरपा खातीर म्हज्या इश्टांचो खूब मोटो वांटो आसा.
म्हजें पयली ते दुसरे यत्ते मेरेनचें शिक्षण बांबोळे केंद्रीय विद्यालयांत जालें. उरिल्लें शिक्षण होली क्रॉस बस्तोडें स्कुलांत जालें. पिरायेच्या 6 वर्सांचेर हांव संगीत वाद्यां वाजोवंक शिकलों. स तरेचें हांव संगीत वाद्यां वाजयतां. तशेंच म्हाका खेळांत खूब आवड आसा. फुटबॉल, पेंवप आनी स्कुलांतल्या सर्तींनी हांवें बुद्दीबळ खेळांत लेगीत वांटो घेतला अशें ज्योशुआन सांगलें.
आतां 10 वी पास जाले उपरांत ज्योशुआन म्हापशेंच्या सेंट झेवियर उच्च माध्यमीक विद्यालयांत 11वेंत विज्ञान फांट्यांत प्रवेश घेतला. ताका फुडाराक कोण जावपाचें आसा असो प्रस्न विचारल्यार ज्योशुआन सांगलें, ताका एरोनॅटिकल इंजिनयर जावपाचें आसलें. पूण हें शिक्षण गोंयांत मेळना. म्हाका गोंया भायर वचपाचें ना. देखून हांव गोंयांत रावन इलेकट्रॉनीक इंजिनयरींग शिकतलों, अशें ताणें म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
