भांगरभूंय | प्रतिनिधी
भांगरभूंय । प्रतिनिधी
पणजी : उदरगतीक उर्बा दिवपा सयत विकसित भारत 2047चे उद्दिश्ट साध्य करपा खातीर एक देश, एक वेंचणूक हो बदल पूरक थारतलो. देशांत एकाच वेळार वेंचणूक जाल्यार उदरगत तशेंच सुशासनाचेर लक्ष केंद्रीत करप सरकाराक शक्य जातलें. हाका लागून गोंयकार आनी गोंय सरकाराचो एक देश, एक वेंचणूक संकल्पनेक पुराय तेंको आसा, अशें मुख्यमंत्री डॉ. प्रमोद सावंत हांणी सांगलें.
एक देश, एक वेंचणूक (वन नेशन, वन इलेक्शन) हे संकल्पनेचेर विचार विनिमय करपा खातीर स्थापन केल्ली जोड संसदीय समिती (जेपीसी) गोंयांत आसा. घटनेच्या 129व्या घटना दुरूस्ती विधेयक 2024चो अभ्यास करपा खातीर ही समिती स्थापन जाल्या. ही समिती तरेकवार राज्यांक भेटी दिवन सरकार तशेंच संबंदिता कडल्यान सुचोवण्यो, हरकतीं आयकून चर्चा करता. सध्या दोन दीस ही समिती गोंयांत आसा. खासदार पी. पी. चौधरी हे समितीचे अध्यक्ष आसा. बाणावली हांगा जोड संसदीय समितीच्या बसकेंक मुख्यमंत्री डॉ. सावंत हांणी उपस्थिती लावन म्हत्वाच्यो सूचोवण्यो केल्यो.
वेंचणूक हो लोकशायेचो अविभाज्य घटक आसा. दर वर्सा ह्या ना त्या राज्यांत विधानसभा वेंचणूक जायत आसता. हाचो परिणाम प्रशासन, धोरण तशेंच अर्थीक स्थितीचेर जाता. एकाच वेळार वेंचणुको जाल्यो जाल्यार सुशासन, धोरणाची आंखणी तशेंच उदरगतीचेर लक्ष केंद्रीत करप शक्य जातलें. तरेकवार राज्यांत वेगवेगळ्या वर्सा जावपी वेंचणुकेचो प्रशासन तशेंच स्थैर्याचेर परिणाम जाता, अशें मुख्यमंत्री डॉ. सावंत हांणी सांगलें.
एक देश, एक वेंचणूक संकल्पनेची कार्यवाय सुरू करपा खातीर प्रधानमंत्री नरेंद्र मोदी हांकां मुख्यमंत्र्यांनी परबीं भेटयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
