भांगरभूंय | प्रतिनिधी
चंडिगढ, खबरां संस्था: ल्हान भुरगीं आशिल्ल्या पालकांक हुस्को करपी ही एक खबर आसा. चडशे ग्राहक भुरग्यांक खावपाक घेवन दितना ताचेर आशिल्ली म्हायती वाचिनात. पूण हे बेपर्वायेक लागून जीव वचूं येता हें तुमकां खबर आसा? पंजाबांत अशीच एक घडणूक घडल्या. देड वर्सां पिरायेचे चलयेक एक्सपायरी डेटीची चॉकलेट खावन रगताची उलटी जावपाक लागली. उपरांत तिका उपचारा खातीर हॉस्पिटलांत दाखल केल्ली. उल्लेख केल्ली चॉकलेट पटियाला हांगच्या एका दुकानांतल्यान घेतिल्ली. हे घडणुके उपरांत पुलीस आनी भलायकी खात्यान मेळून चवकशी केली आनी उल्लेख केल्ले चॉकलेटीची एक्सपायरी डेट सोंपल्या अशें दिसून आयलें.
मुळांत लुधियानाचे हे चलयेचे कुटूंब पटियालांतल्या आपल्या सोयर्यांच्या घरा गेल्लें. सोयरो विकी गेहलोट हांणी लागसारच्या दुकानांतल्यान चॉकलेट हाडून ते ल्हान चलयेक दिली. घरा आयले उपरांत चलयेन ती चॉकलेट खाली तेन्ना तिच्या तोंडांतल्यान रगत येवपाक लागलें. उपरांत तिका रोखडीच लागसारचे मेडीकल कॉलेजींत उपचारा खातीर दाखल केल्ली. वैजकी तपासणे उपरांत ते चलयेन विखारी चॉकलेट खाल्ल्यान तिका रगत उलटी जाल्ल्याचें दिसून आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
