भांगरभूंय | प्रतिनिधी
पणजी: सरकारान सुरू केल्ल्या एआय समार्ट सिग्नल येवजणे वरवीं 1 जून 2023 ते 30 जून 2024 ह्या काळांत सुमार 9 कोटी 4 लाख 98 हजार 300 रुपयांचें चलन जारी केलां. ह्या काळांत यंत्रणे वरवीं 83 हजार 93 चलन जारी केल्यात. येरादारी मंत्री मॉवीन गुदिन्हो हांणी विधानसभेंत लेखी जापे वरवीं ही म्हायती दिली. हे विशीं आमदार विजय सरदेसाय हांणी अतारांकीत प्रस्न उपस्थीत केल्लो.
सद्या ही यंत्रणा धा कडेन कार्यरत आसा. हातूंत गोंय विद्यापिठा कुशीच्या कॅमेरांतल्यान सगल्यांत चड 4 कोटी 29 लाख 29 हजार 800 रुपयांचो दंड दिवपी 35 हजार 590 चलन जारी केले. उपरांत पर्वरे तीन बिल्डींग हांगासरल्या कॅमेरांतल्यान सगल्यांत चड 1 कोटी 99 लाख रुपयांचे वट्ट 21 हजार 251 चलन जारी केले. जाल्यार बांबोळे कॅमेरांतल्यान 1 कोटी 29 लाख 28 हजार रुपयांचे 9976 चलन दिले.
यंत्रणे वरवीं सगल्यांत चड 45 हजार 814 चलन गतीचें उल्लंघन केल्ले खातीर दिल्यात. उपरांत येरादारीचे विवीध नेम मोडिल्ले खातीर 35 हजार 521 चलन दिल्यात. तशेंच विमो नाशिल्लें वाहन चलोवपा खातीर 5615, वाहन कर भरिल्ल्याचो पुरावो दाखोवंक नाशिल्ले खातीर 3437 चलन दिल्यांत.
हाचे आदीं गोंयांत सुमार 8 कोटी रुपया खर्च करून 10 सुवातांनी एआय यंत्रणा बसयल्या. हातूंत दिवजा सर्कल, पणजे फेरी जंक्शन, कस्टम हावस जंक्शन, कला अकादमी जंक्शन, काकुलो मॉल जंक्शन, मालीम जंक्शन, चिंबल जंक्शन हांचो आस्पाव आसा. तशेंच पर्वरे येरादारी चड आशिल्ल्या तीन जंक्शनाचेर लेगीत अशी यंत्रणां बसयल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
