भांगरभूंय | प्रतिनिधी
जॉर्जिया: अमेरिकेंतल्या जॉर्जिया राज्यांतल्या हार्मनी एलिमेंटरी स्कुलांत एक वेगळेंच दृश्य पळोवंक मेळटा. पयले यत्तेंतले भुरगे रंगीबेरंगी प्लास्टीक ब्लॉक्सांनी घरां बांदपाक मग्न आसात. थंयच्यो शिक्षिका शानाज लखानी भुरग्यांक प्लास्टिकाचें खेळणें दाखोवन म्हणटात, हो आमचो ‘यूजर’. आमकां हाचे खातीर एक घटमूट घर बांदपाचें आसा, जें भुंयकांपांत लेगीत कोसळचें ना. हांगा शिक्षिका भुरग्यांक ‘यूजर अणभव’ (User Experience) आनी ‘एआय अॅप्लिकेशन्स’ (AI Applications) सारके कठीण तांत्रिक शब्द सहजतायेन शिकयतात. एआय, डिजीटल शिकोवपी ही संवसारांतली पयली शाळा.
व्हायटबोर्डाचेर डेटा सायन्स आनी प्रोग्रामिंगचे रंगीबेरंगी त्रिकोण काडिल्ले आसात. पूण, ७ वर्सांच्या या कंवळ्या भुरग्यांक हाचो एआय कडेन कितें संबंद आसा हाचें कांयच पडिल्लें ना. ते फक्त आपले शिक्षिकेचे मांडयेर बसून, इश्टां वांगडा खेळण्यांचें घर करतात.
दाव्या परस वास्तव वेगळें
फुडाराचे कल्पनेन आमी अश्यो शाळा पळयतात, जंय रोबोट शिकयतात आनी भुरगे चॅटबॉट्स कडेन उलयतात. पूण, प्रत्यक्षांत ही शाळा तंत्रज्ञाना परस चड मानवी संबंदांचेर आदारिल्ली आसा. वर्ल्ड इकोनॉमीक फोरमाच्या ‘नोकर्या बदलपी’ अहवालाचो अभ्यास करून ही शाळा डिझायन केल्ली. पूण शाळेचे आदले विद्यार्थी मुहम्मद रिझवान आनी जोसेफ श्राग हांणी सांगलें, ‘एआय स्कूला’चो दावो प्रत्यक्षा परस वेगळो आसा. आमी एआयचो चड वापर करिनांत. रोबोटिक्स सारके कांय वर्ग सोडल्यार, बाकीचें शिक्षण पारंपरीक पद्धतीन जाता. भाशा आनी इतिहासाच्या वर्गांत शिक्षक भुरग्यां कडेन हातान निबंध बरोवन घेतात, जेणे करून ते एआयची मदत घेवचे नात.
’हांव फकत म्हज्या मेंदवाचो वापर करतां’
शाळेच्या मेकॅनिकल इंजिनिअरिंग रुमांत कार्डबोर्डा सावन एक मोठें फिरपी खेळणें तयार करपी एका विद्यार्थ्याक जेन्ना विचारलें की, ताणें हे खातीर खंयचें एआय टूल वा चॅटबॉट वापरलें? तेन्ना ताणें सांगलें, ना, हांव फक्त म्हज्या मेंदवाचो वापर करतां. इतिहासाच्या वर्गांत जेन्ना भुरगें चॅटबॉटा कडेन प्रस्न-जाप करतात, तेन्ना शिक्षिका केसी होलीक्रॉस तांकां मार्गदर्शन करता. एक पालक लिडिया क्लार्क म्हणटात, आमचीं भुरगीं तंत्रज्ञानाक लागून न्हय, जाल्यार शाळेंतल्या सुरक्षीत वातावरणाक लागून आनी बर्या शिक्षकांच्या मानवी संबंदांक लागून फुडें वतात.
खान अकॅडमीची कबुली
एआय सॉफ्टवेअर तयार करपी ‘खान अकॅडमी’चे मुखेली सलमान खान हांणी मान्य केलां की, जायत्या विद्यार्थ्यां खातीर एआय टूल वरवीं शिकप सामकें निराशाजनक थारलें, कारण मशीन भुरग्यांच्या मानसिक गोंदळाक मनशा सारकें समजू शकनात. शाळेच्या अधिकार्यांनी लेगीत निमणे मान्य केलें की, तांचे खातीर एआयचो अर्थ फक्त कोडिंग शिकोवप न्हय, तर त्या ‘टिकाऊ कौशल्यांक’ (जशें की- नैतिक विचार, परस्पर सहकार्य आनी सर्जनशीलता) सांबाळप आसा, जीं मशिनां केन्नाच शिकूंक शकनात.
स्टॅनफोर्ड विद्यापीठान ८०० परस चड संशोधन पत्रांचो अभ्यास करून एक म्हत्वाची शिटकावणी दिल्या. एआय साधनां रोखडें काम पुराय करपाक मदत करतात, पूण लांब पल्ल्यांत भुरग्यांची स्वता विचार करपाची तांक उणी जाता. वैज्ञानिकांनी हाका ‘कॉग्निटिव्ह सरेंडर’ (Cognitive Surrender) अशें नांव दिलां, जंय मनीस आपले निर्णय यंत्रांचेर सोंपयता.
हार्मनी स्कूल हो धोको वळखून ‘ह्यूमन टच’ (मानवी स्पर्श) चेर भर दिता. हांगा एआयचो वापर फक्त एक साधन म्हणून करतात, आनी मुख्य भर परस्पर चर्चा, शारीरिक उपक्रम आनी शिक्षकांच्या मार्गदर्शनाचेर आसा, जेणेकरून भुरग्यांची मूळ विचारशक्ती तिगून उरली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
