भांगरभूंय | प्रतिनिधी
इंडीयन प्रिमीयर लिगेच्या (आयपीएल) अंदूंच्या हंगामा वरवीं पुनरागमन करतलो. तशेंच तो दिल्ली कॅपिटल्साचें फुडारपण लेगीत करतलो. काल दिल्ली कॅपिटल्साचो अध्यक्ष पार्थ जिंदलान हे विशींची घोशणा केली. पंत 14 म्हयन्यांनी प्रोफेशनल क्रिकेटींत पुनरागमन करतलो.
31 डिसेंबर 2022 दिसा दिल्ली सावन रुडकी वतना पंताचो अपघात जाल्लो. ते उपरांत ताचेर ऑपरेशन जालें. ह्याच कारणाक लागून 2023चो पुर्ण आयपीएल हंगाम चुकिल्लो. ऋषभाचे सुवातेर ऑस्ट्रेलियेच्या डॅव्हिड वॉर्नरान पंगडाचें फुडारपण केल्लें. राष्ट्रीय क्रिकेट अकादमीन फाटल्याच सप्तकांत ऋषभाक पुर्ण तंदुरुस्त आशिल्ल्याचें प्रमाणपत्र दिल्लें.
मुखेलीच्या रुपान ऋषभ पंताक परतून येवपाक दितना खोशी जाता. आमी नव्या हंगामाची आतुरतायेन वाट पळयता अशें पार्थ जिंदलान म्हणलें.
विकेटकिपींग विशीं अजून दुबाव
आयपीएलांत ऋषभ पंत विकेटकिपींग करतलो काय ना हे विशीं दुबाव कायम आसा. पार्थ जिंदल वा पंगड वेवस्थापनांतल्या एकाय वांगड्यान पंताच्या विकेटकिपिंगे विशीं भाश्य करूंक ना. पूण, कांय दिसां पयलीं ऋषभान विकेटकिपींग आनी व्यायाम करतना काडिल्ले व्हिडियो इंस्टाग्रामाचेर पोस्ट केल्ले. तशेंच तो राष्ट्रीय क्रिकेट अकादमींत 20 ओव्हरींचे प्रशिक्षण मॅचींत बॅटींग आनी फिल्डिंग करतना दिशिल्लो.
डिसेंबर 2022 पसून मैदाना पसून पयस
ऋषभ डिसेंबर 2022त बांगलादेशा आड टॅस्ट माळ खेळ्ळ्या उपरांत क्रिकेट मैदाना पसून पयस आसा. 31 डिसेंबर 2022त ताका अपघात जाल्लो. ते उपरांत ताच्या उजव्या पांयाच्या धोंपराचेर तीन ऑपरेशनां जाल्यात.
मजगतीं, दिल्ली कॅपिटल्स घरच्या मैदाना वयल्यो सुरवातीच्यो दोन मॅची विशाखापट्टणमांत खेळटलो. हाचें फाटलें मुखेल कारण म्हणल्यार बायलांची प्रिमीयर लिगेचे प्ले ऑफ सयत 11 मॅची दिल्लीच्या अरुण जेटली स्टेडियमाचेर जाल्ल्यो. ताका लागून मैदान परतून सारकें करपाक वेळ मेळचो म्हणून दिल्ली कॅपिटल्साच्यो सुरवातीच्यो दोन घरच्या मैदाना वयल्यो मॅची विशाखापट्टणमांत स्थलांतरीत केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
