भांगरभूंय | प्रतिनिधी
चेन्नय सुपर किंग्सान इंडीयन प्रिमीयर लीग (आयपीएल) हंगाम सुरू जावपाक एक दीस बाकी आसतना मुखेली बदलपाची घोशणा केली. पंगडाक पांच खेपे वस्तादपण मेळोवन दिवपी महेंद्रसिंग धोनीन मुखेलीपद सोडपाचो निर्णय घेतला.
ताचे सुवातेर 27 वर्सां पिरायेचो युवा बॅट्समन ऋतुराज गायकवाड पंगडाचें फुडारपण करतलो. चेन्नय सुपरकिंग्साचो तो चवथो मुखेली थारलो. ताचे पयलीं महेंद्रसिंग धोनी, सुरेश रैना आनी रवींद्र जडेजा हांणी चेन्नय सुपरकिंग्साचें फुडारपण केलां.
गायकवाड 2019 सावन चेन्नय सुपरकिंग्साचो वांगडी आसा. तशेंच तो आयपीएलांत 52 मॅची खेळ्ळा. चेन्नय सुपरकिंग्सा आयज उक्तावणाची मॅच रॉयल चॅलेंजर्स बंगळुरू आड खेळटलो.
चेन्नय सुपरकिंग्स 16तले 14 हंगाम खेळ्ळा. ह्या सगल्या हंगामांनी धोनी मुखेली आशिल्लो. 2022त रवींद्र जडेजाक मुखेली केल्लो. पूण, जडेजान हंगाम चालू आसतना मदींच मुखेलपद सोडिल्ल्यान धोनीक परतून मुखेलपद सांबाळची पडली. ते उपरांत 2023त धोनीन पांचवे खेपे चेन्नय सुपरकिंग्साक वस्तादपण जोडून दिलें. सुरैश रैनान कांय मॅचींनी फुडारपण केलां.
गायकवाडान चेन्नय वतीन आपलो पयलो हंगाम खेळिल्लो, तेन्नाच क्रिकेटीचे तज्ञ ताका फुडारांतलो मुखेली आसा अशें म्हणताले. तशेंच धोनीची तो आवडीचो खेळगडो आसा. सध्या तो 27 वर्सां पिरायेचो आसा आनी खूब काळ तो खेळपाक शकता.
गायकवाडान हाचे पयलीं राष्ट्रीय पंगडाचें फुडारपण केलां. 2023त चीनांत जाल्ले आशियायी खेळांत भारताच्या दादल्यांच्या पंगडाचें फुडारपण केल्लें. त्या वेळार भारतान भांगरा पदक जिखिल्लें.
महाराष्ट्रा वतीन देशांतर्गत क्रिकेट खेळपी गायकवाड 2019च्या हंगामांत चेन्नय सुपरकिंग्सा वतीन पयले खेपे खेळिल्लो. आतां मेरेन चार हंगामांनी मेळून 52 मॅची खेळ्ळा आनी 39.07चे सरासरीन आनी 135.52चे स्ट्रायक रेटीन 1797 धांवड्यो केल्यात.
2023चे आयपीएलांत चेन्नय सुपर किंग्साक जैत मेळोवन दिवपाक ताणें मोलादीक योगदान दिल्लें. ताणें 16 मॅचींनी 590 धांवड्यो केल्ल्यो.
धोनी 250 आयपीएल मॅची खेळ्ळा. हातूंत 38.79चे सरासरीन 5082 धांवड्यो केल्यात आनी 24 अर्द शेंकडे मारल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
