भांगरभूंय | प्रतिनिधी
चार दिसां सावन नळांतल्यान उदका पुरवण बंद, टँकराचोय पत्तो ना
भांगरभूंय । प्रतिनिधी
फोंडें: उसगांव पंचायत वाठारांतल्या लोकांक फाटल्या कांय दिसां सावन उदकाचो प्रस्न सतायता. मध्यानरातीर नळांतल्यान कांय प्रमाणांत उदक येता खरें, पूण ताका लागून बायलांची न्हीद पेड्डेर जाता. उडीवाड्यार फाटल्या 4 दिसांच्यान नळांतल्यान उदका पुरवण बंद जाल्या. तशेंच पालवाडो, वडबाग आनी हेर गांवांतली उदकाची समस्या गंभीर जाल्या. बांदकाम खात्यान उदकाची समस्या सोडोवचे खातीर उदकाच्या टँकराची वेवस्था करपाची मागणी थळावे लोक करतात.
उसगांव वाठारांत उदकाची समस्या दिसान दीस गंभीर जायत आसा. उडीवाड्यार फाटल्या 4 दिसांच्यान नळांतल्यान येवपी उदक बंद जालां. गांवा पासून सुमार 300- 400 मिटर अंतराचेर रावपी बिगर गोंयकार कामगारांक कंत्राटदारा वतीन टँकरांतल्यान उदकाची पुरवण करतात. त्या उदकाचो वापर सध्या गांवांतले लोक करपाक लागल्यात. रातचे उसरां गांवांतले लोक थंय उदक व्हरपा खातीर वतना बुधवारा दिसले.
वडबाग आनी पालवाड्यार लेगीत लोकांक उदकाचो उणाव जाणवता. कांय दिसां आदीं पालवाडो गांवांतल्या बायलांनी फोंडेंच्या बांदकाम खात्याच्या अभियंत्याक घेराव घालून उदकाची पुरवण सुरळीत करपाची मागणी केल्ली, पूण अजून मेरेन लोकांक उदकाची पुरवण सुरळीत करूंक नाशिल्ल्याच्यो कागाळी वाडल्यात. वडबागांतल्या लोकांची उदकाची समस्या पयस करचे खातीर थळावी पंच मनिषा उसगांवकार हांणी स्वताच्या खर्चान दोन टँकरांतल्यान आयज मेरेन उदकाची पुरवण केल्या. उदकाची समस्या आसली तरी लेगीत थळावे लोक ताचे आड आवाज काडपाचे तयारेंत नाशिल्ल्याचें दिसता. मनिषा उसगांवकार हांणी सांगलें, उसगांव वाठारांतल्या खूबश्या गांवांनी उदकाची समस्या सतायता. बांदकाम खात्या कडेन साबार खेपे कागाळी करून लेगीत अजून मेरेन टँकांतल्यान उदकाची पुरवण करिनात. मात सरकार, खूबशीं उदरगतीचीं कामां केल्ल्याची घोशणा करून लोकांची दिशाभूल करपांत गुल्ल आसा. मुख्यमंत्री तशेंच बांदकाम मंत्री डॉ. प्रमोद सावंत हांणी लक्ष दिवन लोकांक सुरळीत उदका पुरवण करपाची गरज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
