भांगरभूंय | प्रतिनिधी
फोंडें, प्रतिनिधी: उसगांवा घरा लागसारा आशिल्ल्या एका व्हाळांत बुडून दोन वर्सां पिरायेच्या चल्याक मरण आयलें. मरण आयिल्ल्या चल्याचें कुटूंब झारखंडचें. तीं ह्या वाठारांतल्या कुळागरांत काम करतात. फोंडें पुलिसांनी हे घडणुकेचो पंचनामो केलो.
हे विशीं चड म्हायती प्रमाण, बिरेस्तारा रातीं बिराडाक रावपी झारखंडाच्या कुटुंबांतलो दोन वर्सां पिरायेचो चलो भायर खेळटालो. ताची आवय मोबायलाचेर उलयतना तो भुरगो अचकीत घरा लागसारा आशिल्ल्या व्हाळा कडेन गेलो. फाटल्या कांय दिसां सावन झडपी उटंगराच्या पावसाक लागून हो व्हाळ उदकान भरिल्लो. व्हाळा लागसारा गेल्ले कडेन तो भुरगो व्हाळांत कोसळ्ळो. ताचो आवाज आयकून घरांतलीं सगळ्या जाणांनी व्हाळा लागसारा धांव मारली. थळाव्यांनी ताका तातूंतल्यान भायर काडलो. तो गंभीर अवस्थेंत आशिल्ल्यान ताका १०८ ऍम्बुलन्सींतल्यान पिळयेंच्या मुळाव्या भलायकी केंद्रांत दाखल केलो. मात थंय दोतोरांनी तपासणी करून त्या भुरग्याक मरण आयिल्ल्याचें सांगलें. फोंडें पुलीस निरीक्षक तुषार लोटलीकार हांच्या मार्गदर्शना खाला घटनेचो पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
