भांगरभूंय | प्रतिनिधी
फोंडें : वडबाग- उसगांवां फाटल्या चार दिसां सावन नळांक उदक ना. हाका लागून थळाव्यांक पयशे दिवन टँकराचें उदक विकत घेवचें पडटा. तिडकल्ल्या बायलांनी बिरेस्तारा थळावी पंच मनीषा उसगांवकार हांचे सयत फोंडेंच्या बांदकाम खात्याच्या कार्यालयाक भेट दिवन जाब विचारलो. कनिश्ठ अभियंतो यशराज तळपी हांणी ह्या वाठारांत वचून पळोवणी करपाचें आस्वासन दिलें. फुडल्या कांय दिसांनी उदकाची पुरवण सुरळीत करूंक ना जाल्यार कळशी मोर्चो काडपाची शिटकावणी बायलांनी दिल्या.
चार दिसां सावन गांवांतल्या नळांक उदक येना. दर खेपो आवाज उठयले उपरांत, बांदकाम अभियंत्यां कडेन कागाळ केले उपरांतूच उदकाची पुरवण करतात. हाका लागून तिडकल्ल्या बायलांनी बिरेस्तारा अभियंत्याची भेट घेवन चर्चा केली. पंच मनीषा उसगांवकार हांणी फाटल्या कांय म्हयन्यां सावन गांवच्या लोकांक उदकाची पुरवण सुरळीत जायना अशें सांगलें. कागाळ केले उपरांत मात रोखडीच उदकाची पुरवण करतात. बिरेस्तारा सकाळीं कनिश्ठ अभियांत्यान पळोवणी करपाचें आस्वासन दिलां. फुडें उदकाची पुरवण सुरळीत जायना जाल्यार कळशी मोर्चो काडपाची शिटकावणी बायलांनी दिल्या, अशें तिणें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
