उसगांवांत दोन अपघातः हिट ॲण्ड रन अपघातांत एकल्याक जाग्यारुच मरण, जीप-दुचाकी अपघातांत दोग जाण जखमी
भांगरभूंय | प्रतिनिधी
फोंडें, प्रतिनिधी ः उसगांवां नेस्ले कंपनी लागसार भिरांकूळ हिट ॲण्ड रन अपघात जालो. ह्या अपघातांत अज्ञात मनशाक जाग्यारुच मरण आयलें. ताची तकली सुमार एक किलोमीटर अंतराचेर पडिल्ली मेळ्ळी. अपघाता उपरांत गाडयेकारान घडणूक सुवाती वयल्यान पळ काडलो.
पुलीस घडणूक सुवातेर पावल्यात. हो भिरांकूळ अपघात पळयल्यार खंयच्या तरी व्हडले गाडयेन मरण आयिल्ल्याक चिडि्डल्ल्याचो दुबाव आशिल्ल्याचे पुलिसांनी सांगलें. फोंडें पुलिसांनी ह्या अपघाताची रोखडीच दखल घेवन तपास सुरु केल्लो.
फोंडें पुलिसांनी तपास सुरु केले उपरांत कांय काळा उपरांत चवकशी करुन पळून गेल्ल्या ट्रक ड्रायव्हराक अटक केली. तशेंच आरजे 27 जीबी 2124 क्रमांकाचो ट्रकय पुलिसांनी जप्त केलो.
तेच वेळार आयज उसगांवां एमआरएफ कंपनी लागसारच्या म्हामार्गावयल्यान वचपी स्कुटरीक मुखेल रस्त्या वयल्यान येवपी जीपीन धपको दिल्ल्यान स्कुटरी वयले दोग जाण जखमी जाले. सागर गांवकार आनी स्वेत गांवकार (रा. वाघोण – किर्लपाल) अशीं जखमी जाल्ल्यांची नांवां आसात.
मेळिल्ले म्हायती प्रमाण, बिरेस्तारा सकाळीं 11.30 वरांचे सुमाराक दोन तरणाटे दुचाकी वयल्यान फोंडेंतल्यान तिस्क-उसगांवां वताले. एमआरएफ कंपनी लागसारच्या राष्ट्रीय म्हामार्गांचेर पावतकच मुखेल रस्त्यावयल्यान येवपी जीपीन दुचाकीक धपको दिलो. हांतूत दुचाकी वयले दोग जाण जखमी जाले. जखमी जाल्ल्यांचेर पिळये प्राथमीक भलायकी केंद्रांत उपचार सुरु आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
