उसगांवच्या 30 तरणाट्यांक पाडेली प्रशिक्षण

भांगरभूंय | प्रतिनिधी

भांगरभूंय । खबरां मेज
पणजीः स्वयंपूर्ण गोंय मिशनाचो एक वांटो म्हणून उसगांव- फोडें हांगच्या 30 तरणाट्यांक पाडेली प्रशिक्षणा खाला माडार कशें चडप हे शिकयले आनी तांका पाडेली मशिनां वितरीत केलीं.
उसगांव पंचायत सभाघरांत जाल्ले हे प्रशिक्षण कार्यावळीक थळावो सरपंच नरेंद्र गांवकार, उपसरपंच संगीता दहिफोडे आनी स्वयंपूर्ण इश्ट पंचायत राज उपसंचालक प्रसिद्ध नायक हाचें हस्तुकीं हीं मशिनां दिलीं. मुख्यमंत्री डॉ प्रमोद सावंत हांच्या फुडारपणा खाला गोंयांत स्वयंपूर्ण मिशना खाला नेटान उदरगतीचीं कामां चल्ल्यांत आनी स्वयंपूर्ण इश्ट तळागाळांत लोकांक मार्गदर्शन करतात अशें नरेश गांवकारान सांगले.
प्रसिद्ध नायक हाणे गांवांतले लोक स्वयंपूर्ण जातात हे खातीर खोस उक्तायली. उसगांवच्या लोकांनी स्वयंपूर्ण येवजण्यांचो फायदो करून घेवचो अशें तांणे मागले. कॉर्पोरेट जापसालदारी म्हणून गौरव पोकळे हांच्या आस्थापना वतीन पाडेली मशिनां तरणाट्यांक दिलीं.