भांगरभूंय | प्रतिनिधी
जतनाय घेवपाचो हवामान खात्याचो सल्लो
पणजी, प्रतिनिधी : येते सात दीस राज्यांत उष्णतायेच्या ल्हाराची शक्यता नासली तरी चडान चड तापमान 33 ते 35 अंशां मदीं आसतलें, असो अदमास हवामान खात्यान उक्तायला. थारावीक काळांत उदक पियेपा सयत जतनाय घेवपाचो सल्लो हवामान खात्यान दिला.
फाटले काय दीस राज्यांतलें तापमान वाडत आसा. हाका लागुन गर्मी वाडल्या. राज्यांतल्या काय वाठारांनी पियेपाच्या उदकाचो उणाव आसा. हाका लागून जीण विस्कळीत जाल्या. चडान चड तापमान जेन्ना 37 अंशाचेर पावता तेन्नाच उष्णतायेचें ल्हार आयिल्ल्याचें म्हणपाक जाता, अशें हवामान खात्यांन स्पष्ट केलां. आयतारा पणजेतलें चडान चड तापमान 33 ते 34 अंशां मदीं आशिल्लें.
तापमान वाडीचो खर धोको नासलो तरी जाणट्या आनी दुयेत मनशांनी वतात भोंवचें न्हय, गरज नासतना दनपराच्या कडाक भायर सरचें न्हय, अशी शिटकावणी हवामान खात्यांन दिल्या. उदक पिवचे मात च्या, कॉफी वा सोरो शक्यतो चड पिवचो न्हय. दनपरां भोंवतना तकलेर तोपी घालची वा सत्री घेवची. राजकी पक्षांनी दनपरा प्रचार करताना जतनाय घेवची, असो सल्लो दिला. 20 एप्रील मेरेन तरी तापमानाची अशीच स्थिती आसतली, अशें हवामान खात्यांन स्पष्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.