भांगरभूंय | प्रतिनिधी
आसनसोल, खबरां संस्था: भाजपान शेनवारा १६ राज्यांतल्या १९५ लोकसभा मतदारसंघां खातीर उमेदवारांची पयली वळेरी जाहीर केली. हाचे उपरांत दुसर्या दिसाच भाजपाक धक्को बसलो. कारण अस्तंत बंगालांतल्या आसनसोल लोकसभे खातीर भोजपुरी अभिनेतो आनी गायक पवन सिंहाची उमेदवारी जाहीर जाल्ली. पूण आयज वेंचणूक लढोवपाक आपूण तयार ना अशें तांणी सांगलें. एक्साचेर पोस्ट घालून तांणी आपणाक वेंचणूक लढोवप शक्य ना अशें सांगलां.
ह्या पोस्टांत पवन सिंगान म्हणलां, ‘भारतीय जनता पार्टीच्या वरिश्ठ फुडार्यांचे हांव उपकार मानतां. पक्षान म्हजेर विस्वास दवरलो आनी म्हाका आसनसोला खातीर उमेदवारी दिली. मात म्हाका कांय कारणांक लागून आसनसोल मतदारसंघांतल्यान लढो दिवपाची इत्सा ना.’ पवन सिंहान ह्या पोस्टांत भाजपाचो राष्ट्रीय अध्यक्ष जेपी नड्डा हांकां टॅग केला.
पवन सिंह वेंचणुकेंतल्यान भायर सरले उपरांत तृणमूल कॉंग्रेसीचे राष्ट्रीय सरचिटणीस अभिषेक बॅनर्जी हांणीय भाजपाक लक्ष्य केलें. फकत बंगालांतल्या लोकांच्या बळग्याक लागून पवन सिंहाक फाटीं सरचें पडलें अशें बॅनर्जीन एक्सचेर पोस्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
