भांगरभूंय | प्रतिनिधी
तिगूय बिगर गोंयकार; जमनीच्या धनयाक सोदतात पुलीस
भांगरभूंय । प्रतिनिधी
पेडणें : मोरजी वयलो वाड्या वयले ज्येश्ठ नागरीक उमाकांत खोत हांच्या खून प्रकरणांत लोकेश पुत्तास्वामी (53. रा. बंगळुरू), रोहीत कुमार प्रजापती (20. रा. झारखंड), विजी सुप्पन (36. रा. तामीळनाडू) ह्या तीन दुबावितांक मांद्रें पुलिसांनी अटक केल्या. मोरजेच्या सर्वे नं. 156/3 चो जमीन धनी अशोक कुमार नेदुरुमली हाचो पुलीस सोद घेतात.
खोत हाच्या खून प्रकरणांत जे जे वांटेकार आसात, तांकां बेगिनात बेगीन अटक करतले. तांचेर गुन्यांव नोंद केला, अशी म्हायती मांद्रें पुलीस निरिक्षक गिरेंद्र नायक हांणी हाचे आदीं दिल्ली.
उमाकांत खून प्रकरणांतल्या सगल्या दुबावितांचेर खर कारवाय करपाची गरज आसा. ते भायर थंय येवपी प्रकल्पाक लेगीत आमचो विरोध आसा. ते खातीर आमी पंचायतीक आनी सरकाराक निवेदन सादर करतले, अशें थळाव्या लोकांनी सांगलें. ह्या वेळार थळावे आमदार जीत आरोलकार हांणी उमाकांत हांच्या घरच्यांक भुजवण दिवचे खातीर भेट दिली त्या वेळार थळाव्या लोकांनी तांचे कडेन चर्चा केली. ह्या वेळार पेडणें म्हाल पुलीस उपअधिक्षक सलीम शेख, मोपा पुलीस निरिक्षक हाजीर आशिल्ले.
फकत मजुरांक धरून कांयच जावचें ना. जे कोण ते जमनीचे धनी आसात, ताकाय अटक करपाची गरज आसा, जे मेरेन दुबाविताक अटक करिना, ते मेरेन उमाकांत हांची कूड ताब्यांत घेवचे नात, अशें खोत हांच्या घरच्यांनी आनी थळाव्या लोकांनी आमदाराक सांगिल्लें. आमदार आरोलकार हांणी लोकांक कडेन चर्चा करून फाल्यां मेरेन मुख्य दुबावितांक धरतले, अशी हमी दिल्ली. भायले लोक हांगा कित्याक येतात? आमचेच लोक जमनी तांकां विकतात, हे खातीर दिल्लीची लॉबी ह्या वाठारांत येतात. हाचेर नियंत्रण येवपाक जाय, अशेंय आरोलकार हांणी म्हणिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
