उमळशीक वाडोवपी मॅचींत भारताक जैत

भांगरभूंय | प्रतिनिधी

येजमान भारतान ऑस्ट्रेलिये आडचे टी-20 माळेंतली पयली मॅच 2 विकेटींनी जिखली. भारतान जैता खातीर 209 धांवड्यांची मोख निमाणे ओव्हरीच्या निमाण्या बॉलाचेर आठ विकेटी वगडावन मेळयली.

टी-20त ऑस्ट्रेलिये आड भारतान आतां मेरेन केल्लो हो व्हडलो धांवड्यांचो फाटलाव थारलो. हाचे पयलीं 2013त राजकोटांत जाल्ले मॅचींत भारतान 4 विकेटी वगडावन 202 धांवड्यांचो फाटलाव केल्लो.

भारता वतीन टीम इंडिया मुखेली सुर्यकुमार यादवान 80 आनी ईशान किशनान 54 धांवड्यांची खेळी केली. अखेरच्या ओव्हरींनी रिंकू सिंगान 14 बॉलांनी 22 धांवड्यो केल्यो.

ते वयलीं हांगाच्या डॉ. व्हाय. एस. राजशेखर रेड्डी मैदानाचेर ऑस्ट्रेलियेन टॉस हारल्या उपरांत पयलीं बॅटींग करपाचो निर्णय घेतलो आनी निर्धारीत 20 ओव्हरींनी 3 विकेटी वगडावन 208 धांवड्यो केल्यो. जोश इंग्लिशान पयलो शेंकडो नोंदयलो. ताणें 50 बॉलांनी 110 धांवड्यांची खेळी केली. स्टिव स्मिथान (58) अर्द शेंकड्याची खेळी केली.भारताच्या डावाचे अखेरच्या चार ओव्हरींनी उमळशीक वाडोवपी खेळ पळोवपाक मेळ्ळो. ह्या ओव्हरींनी भारतान 38 धांवड्यो करून जैत जोडलें. पूण, ऑस्ट्रेलियेन चार विकेटी घेवन मॅच चुरशीची केली. भारताक निमाणे ओव्हरींत जैता खातीर सात धांवड्यांची गरज आशिल्ली. पूण, पंगडाक नो बॉलाचेर जैत फावो जालें. ह्या बॉलाचेर रिंकू सिंगान सको मारलो. पूण, नो बॉल आशिल्ल्यान ह्यो धांवड्यांची नोंद जावची ना. शॉन अॅबोटाचे हे ओव्हरींत तीन विकेटी पडल्यो.
भारताची सुरवात बरी जाली ना. मार्कस स्टोयनीसान पयलेच ओव्हरींत ऋतुराज गायकवाडाक एकूय बॉल खेळनासतना तंबूंत धाडलो. तो धांवबाद जालो. ईशान किशनान पंगडाक धपक्यांतल्यान भायर काडपाचो यत्न करतालो. पूण, तिसरे ओव्हरींत यशस्वी जयस्वाल 21 धांवड्यो करून बाद जालो. हांगाच्यान ईशान किशन आनी सुर्यकुमार यादव हाणें मेळून डाव मुखार व्हरपाक सुरवात केली.  पावर प्लेंत भारतान 2 विकेटी वगडावन 63 धांवड्यो केल्यो.