भांगरभूंय | प्रतिनिधी
लंडन, खबरां संस्था: ब्रिटनांत १५ हजार दोतोरांच्या उणावाक लागून एनएचएस (नॅशनल हेल्थ सर्व्हिस) कोसळ्ळ्या. फाटल्या ६ म्हयन्यांत दोतोर आनी नर्सीनी ८ फावटीं संप केल्ल्यान दुयेंतींची वेटींग लिस्ट ७० लाखां मेरेन वाडल्या. अशा वेळार ब्रिटीश दुयेंती भारतांत बर्या आनी सवाय उपचारा खातीर येवपाक लागल्यात. फाटल्या वर्सा ब्रिटनांतल्यान सुमार १२०० दुयेंती भारतांत आयिल्ले. अंदूं हो आंकडो धा पटींनी वाडून १२ हजार जावपाची शक्यताय आसा. एनएचएसच्या परदेशांतल्या आंकड्यां प्रमाण, अंदूं मार्च मेरेन ब्रिटनांतल्यान ३ हजार दुयेंती उपचारा खातीर भारतांत आयल्यात.
वैजकी पर्यटन कंत्राटाचे यत्न
भारत आनी ब्रिटन हांचे मदीं वैजकी कबलाती खातीर यत्न चालू आसात. लंडन स्कूल ऑफ हायजीन आनी आयआयएम बंगळुरू हे खातीर अहवाल तयार करतात. रोखडोच हो अहवाल ब्रिटीश प्रधानमंत्री ऋषी सुनाक हांचे कडेन दितले. हे कबलाती उपरांत ब्रिटनांतल्यान भारतांत वचपी लोकांच्या उपचाराचो खर्च एनएचएस घेतलो. हाका लागून भारतांत आनीक दुयेंती येतले. सद्या एनएचएस फकत कांय युरोपीय देशांनी उपचारा खातीर पयशे दिता.
बंगळुरू शस्त्रक्रिया
म्हाका काळजाचो आताक आयिल्लो अशें लंडनाच्या जॉर्ज मार्शल हांणी सांगलें. एनएचएसची वेटींग लिस्ट आठ म्हयने आशिल्ली. आनीक एक पर्याय म्हळ्यार लंडनांतल्या खाजगी हॉस्पिटलांत २० लाख रुपया खर्च करून शस्त्रक्रिया करप हो आशिल्लो. मागीर जानेवारींत बंगळुरूक वचून सुमार पांच लाख रुपयांनी शस्त्रक्रिया केली. तशेंच विमान तिकीटांचो खर्चूय तातूंत आस्पावलो. मार्शल म्हणटा, एनएचएसची सेवा आनी तशेंच ब्रिटनांतल्या खाजगी हॉस्पिटलांची सेवा हांवें पळयल्या, पूण भारतांत मेळिल्ली काळजी आनी सुविधा जायत्या पटीन बरी आशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
