भांगरभूंय | प्रतिनिधी
गोंयच्या पर्यटनाक निश्चित लाव जातलो
पणजी, प्रतिनिधी : अर्थमंत्री निर्मला सितारमण हांणी 2024 – 2025 वर्सा खातीर सादर केल्लो अंतरीम अर्थसंकल्प विकसित भारताच्या संकल्पनेक उर्बा दिवपी आसा, अशा उतरांनी गोवा चेंबर आॅफ काॅमर्स, टीटीएजी तशेच मंत्र्यांनी अर्थसंकल्पाक येवकार दिला.
सीतारमण हांणी बिरेस्तारा अंतरीम अर्थसंकल्प सादर केलो. पर्यटन वाठारांतल्या येवजणेंचो गोंयांक निश्चितपणान लाव जातलो. नवनिर्मिती केंद्रां, अध्यात्मिक पर्यटन हातुंतल्यो येवजण्यो राज्याक लावकारी थारतल्यो. नुस्तेमारी आनी घरनिर्माण वाठारा खातीर येवजण्यो आसात. हाचोय गोंयांक लाव जातलो. उद्देगां खातीर येवजणे परस सुदारणांची (रिफॉम्स) चड गरज आसा. मुळाव्या सुविधां मदल्यो सुदारणा सुरूच उरपाक जाय, अशें गोवा चेंबरचे अध्यक्ष श्रीनिवास धेंपो हांणी म्हणलां.
पर्यटन हे अर्थवेवस्थेक उर्बा दिवपी इंजिन आसा. हाका लागून अर्थवेवस्थेंत पर्यटना खातीर बरीच तजवीज आसा. गोंयांक हाचो लाव जातलो. रिण येवजणेचो लाव घेवन गोंय सरकारान परिशद घर आनी हेर पर्यटन प्रकल्प फुडें वरपाक जाय, अशें टीटीएजीचे अध्यक्ष निलेश शाह हांणी म्हणलां.
गरीब, बायलां आनी शेतकारांच्या हेताक प्राधान्य दिवपी हो विकसित भारत अर्थसंकल्प आसा. भलायकी आनी अर्थकारणाक उर्बा दिवपी अर्थसंकल्प आसा, अशें भलायकी मंत्री विश्वजीत राणे हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
