भांगरभूंय | प्रतिनिधी
पणजी: गोंय कामगार कल्याण मंडळ गोंयांतल्या उद्देगीक कामगारांच्या फायद्या खातीर खुबश्या कल्याणकारी येवजण्यांची अंमलबजावणी करता. २०२६-२०२७ वर्सा खातीरय राज्यांतल्या पात्र उद्देगीक कामगारांक ह्या येवजण्यां खाला मजत आनी लाव दिवपाचो मंडळाचो प्रस्ताव आसा.
उद्देगीक कामगार वा कर्मचार्यांचे शाळेंत वचपी भुरग्यांक पुस्तकां, चोपड्यो खरेदी करपा खातीर अर्थीक मजत, पयली ते चोवथी मेरेनच्या वर्गांत शिकपी भुरग्यां खातीर गणभेसाचो एक जोड दिवपा खातीर अर्थीक मदत, शाळां आनी महाविद्यालयांनी शिकपी भुरग्यांक शिश्यवृत्ती येवजण, मंडळ वा विद्यापीठाच्या निमण्या परीक्षेंत घेतिल्ल्या गुणांच्या आदाराचेर अर्थीक मजत येवजण. चली विद्यार्थीनीक शाळां/ महाविद्यालयांतल्या हजेरी प्रमाण ५ वी वर्गा सावन फुडल्या खंयच्याय क्षेत्रांतल्या शिक्षणा मेरेन अथीर्र्क मदत येवजण. ह्या शिक्षणीक येवजण्यांचो लाव घेवपा खातीर अर्ज करपाची निमाणी तारीख ३० सप्टेंबर २०२६ अशी आसा.
तशेंच मंडळावतीन उद्देगीक कामगार वा कर्मचार्यां खातीर वक्लां खरेदी, बायल कामगारांक जल्मल्ल्या भुरग्यांची काळजी घेवपाक प्रसूती तारखे सावन ६ म्हयन्यांची रजा, उद्देगीक कामगार वा कर्मचार्यां खातीर खेळां सर्ती आनी समाजीक-सांस्कृतीक कार्यावळ आयोजना खातीर मदत, अभ्यास दौर्या खातीर मदत, मनोरूग्ण भुरग्यांच्या उपचारा खातीर मदत, गोंय कामगार निधींतल्यान वाचप घरांखातीर मदत, स्टरिलायजेशना खातीर अतिरिक्त अर्थीक भरपाय, क्षयरोग उपचाराखातीर मदत, कामा वयल्यान कमी/कपात केल्ल्या कामगारांक अर्थीक मजत, बेकार आशिल्ल्या कामगारांक अर्थीक मजत, स्त्री सखी येवजणे खाला सॅनीटरी नॅपकीन वॅडींग मशीन आनी इन्सीनरेटरा खातीर मजत येवजण, मरण आयिल्ल्या उद्देगीक कामगारांच्या अवलंबीतांक अर्थीक मजत येवजण राबयता.
येवजण्यांचो लाव घेवपा खातीर कामगार सेगीत सेवेत आसपाक जाय आनी निधीक योगदान दिवपी आसपाक जाय. ह्या येवजण्यांचो लाव घेवपा खातीर उद्देगीक कामगार आनी कर्मचार्यांनी आपल्या मालकां वरवीं सचीव, गोंय कामगार कल्याण मंडळ, श्रमशक्ती भवन, चवथो माळो, पाटो प्लाझा, पणजी गोंय ह्या नाम्याचेर अर्ज करचे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
