भांगरभूंय | प्रतिनिधी
पोटाची खळगी भरपा खातीर खण वेवसाय सुरू जावप आवश्यक
पराग रांगणेकाराच्या ‘वायल्ड गोवा’ पुस्तकाचें प्रकाशन
पणजी: तरेकवार प्रकल्पां सयत राज्याची नेटान उदरगत सुरू आसली तरी राज्यांतलो 65 ते 70 टक्के हरीत वाठार राखपाक सरकाराय येस आयलां. पर्यावरण राखपा सयत पोटाची खळगी भरपा खातीर खण वेवसाय सुरू जावप आवश्यक आसा अशें मुख्यमंत्री डॉ. प्रमोद सावंत हांणी सांगलें.
पराग रांंगणेकार हांच्या ‘वायल्ड गोवा’ ह्या कॉफी टेबल पुस्तकाचें प्रकाशन जालें. पुस्तकाचें प्रकाशन जाले उपरांत मुख्यमंत्री डॉ. प्रमोद सावंत हांणी ही म्हायती दिली.
पर्यावरणाची जतनाय करतनाच उदरगत तशेंच रोजगार निर्मितीचो विचार मुख्यमंत्री हे नात्यान म्हाका करचो पडटा. खण उद्देग नाका म्हणप सोंपें आसता. रोजगारा खातीर उद्देग सुरू जावपाक जाय. खणीतले उदक आतां शेती खातीर वापरपाक सुरवात जाल्या. पर्यावरणाची जतनाय करतनाच संतुलीत उदरगत करपाचेर सरकाराचो भर आसा. गोंयांत 490 सुकण्यांच्यो प्रजाती आसा. देशांतल्यो 36 टक्के सुकण्यांच्यो प्रजाती गोंयांत आसात. विदेशी सुकणीं लेगीत गोंयांत स्थलांतरण करतात. सांखळी मतदारसंघातल्या नावेली हांंगा सुकणी पळोपा खातीर आयज लेगीत लोक येतात. नंदा तळें हें राज्यांतले पयलें रामसार थळ म्हज्या कार्यकाळांत अधिसुचीत जालें. गोंय सोबीत दवरपा खातीर सरकाराचे यत्न सुरूच आसात. प्लास्टीक तशेंच कोयर वेवस्थापनाचेर सरकार वर्साक 300 कोटीं परस चड पयशें खर्च करता. साळगांव कोयर वेवस्थापन प्रकल्प हो देशांतलो एक सर्वोत्तम प्रकल्प आसा, अशें मुख्यमंत्री डॉ. प्रमोद सावंत हांणी सांगलें.
म्हायती संचालक दीपक बांदेकार हांणी येवकाराचें उलोवप केले. प्रा. मनोज बोरकार हांणी पुस्तकाचेर उलोवप केलें. पराग रांगणेकार हांच्या पुस्तकांत गोंयांतल्या सुकण्यांची म्हायती मेळटा. तांचो वावर तोखणार करपा सारखो आसा, अशें तांणी सांगलें.
पुस्तका खातीर म्हायती खात्या सयत मुख्यमंत्री डॉ. प्रमोद सावंंत हांचे म्हाका सहकार्य मेळ्ळें. फाटलीं दोन दसकां हांव सुकणीं पळोवपाचो वावर करता. हातूंत म्हाका घरकान्नीचें सहकार्य मेळ्ळें, अशें लेखक पराग रांगणेकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
