भांगरभूंय | प्रतिनिधी
कें द्र सरकाराच्या णव वर्सांच्या वावरांत गोंयचो व्हड योगदान आसा. केंद्रीय संरक्षणमंत्री म्हणून राज्य सरकार, गोंयचे आदले मुख्यमंत्री मनोहर पर्रीकार, केंद्रीय मंत्री श्रीपाद नायक हांच्या वावराची म्हायती प्रधानमंत्री नरेंद्र मोदी हांच्या सरकाराची तुस्त करतना दिवपाक जाय. मोपा विमानतळाचें गोंयचें सपन पुराय करपाक श्रीपादबाबांनी आदल्या संरक्षणमंत्र्यांक दिल्लो आधार मोलाचो. मनोहरबाबांच्या उपरांत श्रीपादभाऊंक केंद्रीय मंत्रिमंडळांत बरें खातें मेळप शक्य आसलें, पूण तें मेळ्ळें ना. खात्याचे राज्यमंत्री, स्वतंत्र कार्यभार तांकां मेळ्ळो, आपले परीन खात्याक तांणी न्याय दिलो. कोविड मजगतीं जाल्ल्या अपघातांतल्यान फुडें वचत ताणीं राज्यांतच न्हय देसांतल्या हेर राज्यांत केल्ल्या वावराची म्हायती लोकांक मेळची.
श्रीपादभाऊ प्रदेश भाजपाच्या मुळाव्या खांब्यां भितल्ले एक, केंद्र सरकाराच्या णण वर्सां निमतान तांचो भोवमान गोंय सरकारान करचो. केंद्र आनी गोंय सरकार उदरगतीचीं नेटान पावलां मारतना उदरगत शिराप थारची न्हय, हे खातीर सरकारान जागें रावचें. पावसाच्या दिसांनी प्रशासन संकश्टा वेळार रस्त्यार दिसपाक जाय. पंचायत, जिल्हो पंचायत, म्हापालिका, नगरपालिका, जिल्हो प्रशासन, भलायकी, पुलिसांनी सादूर रावल्यार वादळ- वाऱ्या सयत सगलीं आडमेळीं पयस जावंक शकतात. सरकारी यंत्रणा, सरकारांतल्या मंत्र्यांचो एकवट आसल्यार थारायल्ल्या वेळार कंत्राटदार, सल्लागार आपलो वावर, उदरगतीचीं कामाय पुराय करतात. कोट्ट्यांनी रुपया मोडून केल्ले पूल रोखडेच मोडप, नव्या रस्त्यांक वेरो वचप आनी उक्तावण करुंक नाशिल्ल्या सुविधांचो लाव घेवन कांय वेळार नागरीक आपले वांगडा सरकाराकय लुकसाण करतात. एक अधिकारी बेस बरें कामकाज करता म्हणून ताच्या माथ्यार कामाचें वजें घाल्यार तो समेस्तांक न्याय दिवंक शकतलो काय, हाचो विचार सरकारान करचो. आयएएस अधिकारी संजित राॅड्रिग्ज दिल्ली जापसालदारकी बरेतरेन सांबाळपी. स्मार्ट सिटीचें सीईओ पदा बराबर तांचे कडेन जी 20 पंगडाच्या बसकांची जबाबदारी आसा. फुडल्या दोन म्हयन्यां भितर आशिल्ल्या जी 20 कार्यगटाच्या बसकांचें वेळापत्रक आनी स्मार्ट सिटींतलीं पडून उरिल्लीं कामां तांचे खातीर आव्हानच. तांच्या हाता सकयल आशिल्ली अधिकाऱ्यांची टीम तांचे वरी रातदीस वावुरता? स्मार्ट सिटीचें सीईओ पद तांचे कडेन येतकीच सगल्यो यंत्रणा कामाक लागल्यो, बसकाय जाल्यो. गरज थंय ते भोंवले, वावराक नेट आयिल्लोय दिश्टी पडटा, एकदां नगरसेवकां वांगडा बसका घेतल्यार स्मार्ट सिटीचो फुडलो वावर कसो जावचो त्यो सुचोवण्यो तांचे कडेन पावतल्यो.
हे आदीं श्यामाप्रसाद मुखर्जी स्टेडियम प्रकल्प, दोनापावल काँक्रीट रस्तो बांदपाचो स्मार्ट सिटी सीईओंचो अणभव, पणजेतलो सुरू जाल्लो वावर स म्हयन्यां भितर सोंपोवपाक तांकां मोलाचो. स्मार्ट सिटीची सिटी येवजण बांदपी संजीत हांणी फाटल्या धा वर्सांत पणजेत जाल्लो बदल मतींत घेवचो. धा वर्सां पयलीं केल्ले येवजणे प्रमाण वावराची दिका आसा काय ती बदलल्या हें कळप, पयसो कितलो आसा तें समजून घेवप हेंय आव्हानच. पणजी चकाचक मोहिमेंतल्यान शारांत कोयर वेवस्थापन जाग्यार घालपी पणजे म्हापालिकेच्या पयल्या आयुक्तांनी एक नियाळ कोयराच्या वेवस्थापनाचो घेवचो. सांतीनेज नाल्यांत माती उडोवन उदकाची सुवात कोण पुरयतात तें सोदल्यार सरकारी यंत्रणा वंय कशी खाता हें होल्मतलें.
कांपाल ते मिरामार मेरेनचो वाॅक वे फकत चलपाचो वाठार न्हय जाल्यार भोवउपेगी सुवात जाल्या. स्मार्ट सिटी येवजणेतलो हो एक म्हत्त्वाचो प्रकल्प. जगबुडीचे फाटभूंयेर न्हंयचे देगेक राखण दिवप आनी लोकांक चलत वचपा खातीर, खीणभर मांडवी न्हंयेते देगेर बसून विसव घेवपाची, न्हंयेचीं रुपां पळोवपाची, अभ्यास, ध्यान करपा पासत सुविधा प्रकल्पांत आसात. कोस्टल रोड हे संकल्पनेतल्यान बांदिल्लो हो प्रकल्प. फुडें फाटीं हो वाॅक वे (पुलीस खात्यान दिल्लें नाव) पणजे खातीर नवो रस्तोय म्हणून उपेगाक येतलो. स्मार्ट सिटी, इमेजिन पणजी कंपनीचे मुळावण घालपी इमेजिन पणजीच्या सीईओंक ते विशीं बरीच म्हायती आसतली. अजूनय ह्या प्रकल्पाची बांदकाम चालूच आसा, भोवउपेगांतल्यान वाॅक वे शाप जावचो न्हय हे खातीर खासा राखणे यंत्रणा जाय. नुस्तें गरोवप, सेल्फी घेवप, स्केटिंग, पार्टी (वाडदिसय हे सुवातींत मनयतात, सोऱ्याच्यो बाटल्योय फुट्टात), सुण्यांक भोंवडाव पासत वापरतात तें पळेल्यार तंटे जावपाची शक्यताय आसा. तकट्यार खावप पिवप सुवातीर हाडचें न्हय अशें बरयलां आसतनाय खावप, पिवप आनी हेर बेशिस्त दिश्टी पडटा. भोंवडेकारांचे चोमे येतात तांकां तशेंच न्हंयेत देंवतल्यांक सुचोवण्यो करपा खातीर तकटे बेगोबेग लावचे. सायकलिंग, स्केटिंग, भुरग्यांचे खेळ, सेल्फी एकाच सुवातेंत जाल्यार कितें जातलें हाची कल्पना इमेजिन पणजीच्या सीईओन करची, सांजवेळा मुखेल करून एक पासय मारल्यार वाॅक वे तल्या वातावरणाचो अदमास येतलो. सुचोवण्यो दिवन त्यो चालीक लायना जाल्यार फकत पणजेच्या न्हय गोंयचे उदरगतीचो पावंडो, फुडाराची दिका जावन आशिल्लो वाॅक वे शाप जावपाची भिरांत आसा. गोंयच्यो दर्यादेगो सोबीत पूण हालीं शॅकस, सुणी, घुवंळी वखदां तशेंच खून, मारामारी, बुडून मरण आयिल्ल्यो म्हणून देस- विदेस पावंड्यार नामना जाता हीय पर्यटनाच्या उदरगतीच्या शापाची काणी. इंग्लेज, हिन्दी, कोंकणी भाशेंतल्यान स्पश्ट म्हायती दिवपी तकट्यांनी जागृताय जातली. देस विदेसांत, थळाव्या पावंड्यारय जायरातींतल्यान म्हायती दिवप गरजेचें. नितळसाणी खातीर, कयर उडोवपा पासत दिल्ले डबे मोडून, फोडून उडोवप, स्मार्ट सिटी पासत हाडिल्लें सामान चोरून व्हरप, पयलीं सुचोवणी दिनासतना रस्ते बंद करप स्मार्ट सिटीच्या वावरांतल्यान घडटा, आतां तरी तें जाग्यार पडत?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
