भांगरभूंय | प्रतिनिधी
भांगरभूंय । प्रतिनिधी
काणकोणः नगर्से- काणकोण हांगच्या उदय जनार्दन नायक हाणे बरयल्ल्या “शिवांगार” ह्या छत्रपती संभाजी महाराजाचे जिणेचेर बरयल्ल्या नाट्य पुस्तकाचं प्रकाशन ज्येश्ठ साहित्यीक डॉ सोमनाथ कोमरपंत हांचे हस्तुकीं जालें. उदय नायक कविता, कथा बरयता, ताणे बरयल्ल्या इतिहासीक नाटकाचे प्रयोग गोंयांत जायते कडेन जातात. आनी तो उयनोन्मुक लेखक उरूं ना जाल्यार परिपक्व साहित्यीक जाता अशें डॉ कोमरपंत हाणी ह्या वेळार सांगलें.
अन्वय प्रकाशन आनी रंगसांगाती,काणकोण हांच्या जोड पालावन उदय नायक हांच्या शिवांगार नाट्य पुस्तकाची प्रकाशन कार्यावळ आयोजीत केल्ली. ह्या वेळार गोवा मराठी अकादमीचे अध्यक्ष प्रा. अनिल सामंत, ज्येश्ठ गायक डॉ प्रविण गांवकार, सेंत्रू प्रोमोतोर दी इन्स्त्रुसांव संस्थेच्या आम सभेचो अध्यक्ष राजेंद्र देसाय, थळावो नगरसेवक हेमंत नायक गांवकार , रंगसांगाती संस्थेचो अध्यक्ष राजेंद्र गोसावी हाजीर आशिल्ले.
शिवांगार नाटकांत मानवी मुल्यांचो संघर्श दिसून येता. संभाजी महाराज आपल्या पूर्वजां विशीं कितें म्हणटात ते ह्या नाटकांत पळोवपाक मेळटा. मनश्यां मदलो मनीस सोदपाचे काम शिवांगांत दिसता अशें डॉ कोमरपंतान सांगलें. शिवांगार ही उत्कृ्श्ट साहित्य कृती आसा. इतिहासीक नाटक बरयतना बरीच कसरत करची पडटा. शिवांगार नाटक आयजे राजकी परिस्थिती विशीं विचार करपाक लागया असें प्रा सामंत हाणे सांगलें. डॉ गांवकार हाचेंय उलोवप जालें. उदय नायकान आपलें मनोगत उक्तायलें.
शिवांगार नाटकांत काम करपी व्यंकटराय नायक, उमेश सतरकार, श्वेता नायक, आनंद पागी, दीपक गोसावी, राजेंद्र गोसावी, स्वस्तिक नायक, संक्षिप्त नायक, विठोबा वेळीप, संकेत फळदेसाय, उमेश तुबकी, पल्लवी भगत, श्रीनिवास रेड्डी, प्रकाश भंडारी, अमोल प्रभुगांवकार, संपदा प्रभुदेसाय, अखिल प्रभुगांवकार, पूर्णय सुधीर, नीलेश नायक, अक्षय तुबकी हाचो भेट वस्तू दिवंन भोवमान केलो. सूत्रसंचालन प्रा शुभलक्ष्मी नायक गांवकारान केले आनी तिणेच उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
