भांगरभूंय | प्रतिनिधी
दोन बांयांनी उदक घुशिल्ल्यान 20 ते 25 घरां बादीत
म्हापशें: गांवसवाडो म्हापश्यां मेगा बांदकामाच्या खणपाच्या कामा वेळार पोरण्या बांदकामाच्या शौचालयाचें सोकपीट फुटून सगले कडेन घाण उदक रहिवाशी वाठारांनी गेल्ल्यान घाण पातळ्ळी. हें घाण उदक दोन बांयांनी घुशिल्ल्यान वाड्या वेलीं 20 ते 25 घरां बादीत जाल्यांत.
ही घडणूक मंगळारा सकाळीं 8 वरांच्या सुमाराक घडली. गांवसवाड्यार श्रीऔदुंबर देवळा कुशीचे दोंगुल्लेर एक मेगा बांदकाम प्रकल्प सुरू आसा. ह्या प्रकल्पाचें बांदकाम सद्या गतीन सुरू आसा. ते खातीर कंत्राटदारान प्रकल्पाच्या नियोजीत सुवातेंतलें पोरणें बांदकाम मोडून खणपाचें काम सुरू केलां.
ह्या खणपाच्या कामा वेळार पोरण्या बांदकामाच्या शौचालयाचें सोकपीट टांकी फोडिल्ली. एखादी मुखेल उदका वाहिनी फुटिल्ल्या प्रकरणांत घाण उदकाचो प्रवाह दोंगुल्ले वेल्यान लोकवस्तेंत आयलो. ताका लागून वाड्यार घाण पातळ्ळी. ह्या उदकाक लागून लोकांक घरांतल्यान भायर सरप शक्य जालें ना. देवूळ वाठारांतूय घाण पातळ्ळी. तशेंच हें घाण उदक घुसून वाड्या वेले लोक वापरत आशिल्ल्या दोन बांयांचें उदक पेड्डेर जालें.
थळावे मनोज गडेकार हांणी सांगलें, सकाळीं उठले बरोबर अचकीत वाड्यार घाण पातळ्ळी. घरांतल्यान भायर सरतकच व्हड प्रमाणांत घाण उदकाचो प्रवाह व्हांवतालो. गिमांत असो प्रवाह आमी केन्नाच पळोवंक नाशिल्लो. ह्या उदकाक लागून 20 ते 25 घरां वापरत आशिल्ल्यो दोन बांयो बादीत जाल्यो आनी आमकां आतां उदकाचो प्रस्न उप्रासला. ह्या मेगा प्रकल्पाचे बांदकाम फ्लॅट आनी व्हिला विकून वतले. उपरांत ह्या प्रकल्पाचो त्रास आमकां थळाव्यांक जातलो.
विजय भिके हांणी म्हणलें, गांवसवाडो हो पयलीं पाचवो वाठार आशिल्लो. तार ते कपेल मेरेन मर्यादीत बांदकामां आशिल्लीं. पूण आतां हे सुवातेर मेगा प्रकल्प उबारतात. आमचो विकासाक विरोध ना, पूण प्रकल्पांक परवानगी दितना योग्य तीन जतनाय घेवंक जाय. ती जतनाय हांगा घेतिल्ली दिसून येना. ताका लागून लोकांक घाणीचे परिस्थितीक सामकार वच्चें पडटा.
गांवसवाडो वाठारांत अडेज ते तीन मिटराचो रस्तो आसा. ताका लागून हांगा मेगा प्रकल्पाक मान्यताय मेळूंकच शकना. तरी लेगीत म्हापशें पालिका आनी संबंदीत प्रशासकी यंत्रणांनी मेगा प्रकल्पाक परवानगी दिल्या. रहिवाश्यांक मंगळार 23 तारखे प्रमाणूच फुडारांत ह्या प्रकल्पाक लागून समस्यांक सामकार वच्चें पडटलें. ह्या प्रकल्पाक हांवें स्वता आनी रहिवाश्यांनी आक्षेप घेतला. तरी लेगीत प्रकल्पाचें बांदकाम सुरू आसून संबंदीत यंत्रणा आनी म्हापशें पालिकेन ह्या प्रकल्पाचो परवानो जाता तितले बेगीन फाटीं घेवचो.
प्रकाश भिवशेट, प्रभाग नगरसेवक
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
