उदका खातीर भिवपाची गरज ना

भांगरभूंय | प्रतिनिधी

म्हयनोभर हुस्को करपाची गरज ना : मंत्री शिरोडकार

सध्या तरी उदकाच्या वापराचेर कसलेच निर्बंध येवचे नात

दोन वेगवेगळ्यो उदकाच्यो पायपलायनी घालपाचो प्रस्ताव

भांगरभूंय । प्रतिनिधी

पणजी : गोंयांतल्या सगल्या धरणांनी उदक आशिल्ल्यान म्हयनोभर पुराय इतले उदक उपलब्ध आसा. सध्या तरी उदकाच्या वापराचेर कसलेच निर्बंध येवचे ना. उदका खातीर तरी भिवपाची गरज ना. दोन, तीन दिसा उपरांत पावस आयलो जाल्यार स्थितींत आनीक सुदारणा जातली. पंदरा दिसा उपरांत उदका पुरवण आनी पेयजल खातें उदकाचे स्थितीचो नियाळ घेतलें, अशें उदका पुरवण खात्याचे मंत्री सुभाष शिरोडकार हांणी सांगलें. सध्या दिसाक गरज आसा तितले 677 एमएलडी उदक उपलब्ध आसा, अशें पेयजल खात्याचे मंत्री सुभाष फळदेसाय हांणी सांगलें.

राज्यात मॉन्सून पावला तरी पावसाचो अजून पत्तो ना. पावस नाशिल्ल्यान सगल्या धरणांनी उदकाची पातळी उणीं जायत आसा. हे फाटभुंयेर गोंयांत उदकाचो उणाव जावपाची भिरांत आसा. उदका विशीं गोंयांत हुस्क्याची स्थिती आसा. हे फाटभुंयेर उदका पुरवण खात्याचे मंत्री सुभाष शिरोडकार आनी पेयजल खात्याचे मंत्री सुभाष फळदेसाय हांणी उदकाचे स्थितीचो नियाळ घेतलो. अधिकाऱ्यां कडल्यान उदकाच्या सांठ्याची म्हायती घेवन तांणी पत्रकार परिशद घेतली.

आनीक 15 ते 20 दीस पावस पडलो ना, तरी उदकाची समस्या निर्माण जावची ना. साळावली धरणांतल्यान दक्षीण तशेंच कुशावती जिल्ह्याक उदकाची पुरवण जाता. साळावली धरणांत आनीक 60 दीस पावा सारकें उदक आसा. तिळारी धरणांतलें उदक आनीक 150 दीस पावतलें, इतले उदक आसा. अंजुणें धरणांत 25 दीस जाल्यार पंचवाडी धरणांत 20 दीस पावतलें इतलें उदक आसा. हे भायर धारबांदोडें आनी पिसुर्ले वाठारांतल्या खणींच्या खंदकांत उदक आसा. हें उदक उपलब्ध करपाची वेवस्था जातली, अशें सुभाष शिरोडकार हांणी सांगलें.

आयच्या खिणाक उदकाची ही स्थिती आसतना काजुमळ वाठारांत 25 बांद बांदपाची येवजण आसा. गांजे आनी ओपा वाठारांत 6 बांद बांदतले. ह्या बांदांक लागून फुडल्या वर्सा आनीक उदक उपलब्ध जातलें.

आयचे घडयेक गोंयांत 677 एमएलडी उदक उपलब्ध आसा. उदक आशिल्ल्यान उदकाच्या वापराचेर निर्बंध घालपाची गरज ना. मात झाडां शिंपपा खातीर, गाडयो धुवपा खातीर पियेवपाच्या उदकाचो वापर करपाक मेळचो ना. हाचेर मर्यादा घालतले. फुडल्या वर्सा मेरेन आनीक 325 एमएलडी उदक तयार जातलें. वर्सा वतांत तशी उदकाची गरज वाडत आसा. हाका लागून आनीक उदकाची वेवस्था करप गरजेचें आसा, अशें पेयजल खात्याचे मंत्री सुभाष फळदेसाय हांणी सांगलें.

गोंयांत 2 हजार किमिची पायपलायन पोरणी आसा. पोरणे पायपलायनीक लागून उदकाची नाशाडी जाता. खूब खेपे खेपो दाब वाडलो जाल्यार ती फुट्टा. ही पायपलायन पांवड्या पांवड्यान बदलतले, अशें फळदेसाय हांणी सांगलें.

प्रक्रिया (ट्रीटेड) आनी बिगरप्रक्रिया (रॉ वॉटर) केल्या उदका खातीर वेगवेगळ्यो पायपलायनी घालपाचो प्रस्ताव आसा. बिगरप्रक्रिया पायपलायनीचें उदक शिंपपा सयत गाडयो धुवपा खातीर वापरप शक्य जातलें. प्रक्रिया केल्लें उदका पियेवपा खातीर वापरपाक जाय. पायपलायन फुटली जाल्यार लोकांनी हेल्पलायनीचेर कागाळ नोंद करची. 7030055136 आनी 7030055036 हे दोन हेल्पलायन नंबर आसात, अशें मंत्र्यान सांगलें