भांगरभूंय | प्रतिनिधी
पणजी, प्रतिनिधी : उदक भरता त्यो खणी वा चिरें खणींचेर वचपाक बंदी घालपाचे आदेश मुख्यमंत्री डॉ. प्रमोद सावंत हांणी भौशिक बांधकाम खात्याक दिल्या. पावसा पयली डॉ. सावंत हांणी आपत्ती वेवस्थापन यंत्रणेची बसका घेतली. हे बसकेत तरेकवार निर्णय घेतले.
आयतारा दिवचल म्हालात चिरें खणींत बुडून दोगांक मरण आयलें. पावसा पयलीच ही घडणूक जाल्ल्यान उदकाच्या खणीं विशी भिरांतीचे वातावरण तयार जाला. खणीं तशेच चिरें खणीत पावसाचे उदक भरता. ह्या खणींत फातर आसता तशेच उदकाचो अदमास ये ना. चिरें खणींचेर वचपाक बंदी घालची, अशे आदेश डॉ. सावंत हांणी दिल्या.
पावसात घसघश्यांचेर सुध्दा पेंवपाक गेल्ले तरणाटे बुडपाच्यो बऱ्योच घडणुको घडल्यात. हे फांटभुयेर सगळ्या घसघशांचेर सादुरतायेचे सुचोवणी तकटे लायतले. घसघशाचेर वचपाचेर निर्बंध नासले तरी आवय बापायन भुरग्यांक योग्य ती समज दिवची, असो उलो मुख्यमंत्री सावंत हांणी मारला.
कामगारांच्या भलायकेची तपासणी करची
कंत्राटदार तशेंच आस्थापनांनी कामगारांच्या भलायकेची तपासणी करपाक जाय. प्रेसाव, गोंडेमुत हे विशी पुराय तपासणी केल्या उपरांतूच कामगारांक कामार घेवपाक जाय. कामगारांच्या भलायकेची तपासणी सक्तीची आसतली.
साचेत अॅप डावनलोड करचो
पावस सुरू जावपाच्या फांटभुयेर राज्याची आपत्ती वेवस्थापन यंत्रणा सक्रीय जाल्या. राज्यांत 11 भोउद्देशी निवारो शेडी (शेल्टर होम) आसा. ह्या शेल्टर होमानी 400 आपदा मित्रांची वेवस्था केल्या. आपत्तीची सुचोवणी मेळपा खातीर आपत्ती वेवस्थापन यंत्रणेन बीएसएनएल, ओएनजीसी कडेन समन्वय सादला. साचेत अॅपाचेर चक्रीवादळ, हुंवाराची शिटकावणी मेळटा. सगळ्यांनी सादुरताये खातीर हो अॅप डावनलोड करचो, असो उलो मुख्यमंत्र्यान केलां.
ते भायर मौसम, मेघदुत आनी दामिनी ह्या अॅपांचेरुय हवामानाची म्हायती मेळटा. सरकारान गोंय हीट वेव कृती धोरण 2024 ची करवाय सुरू केल्या. आपत्ती वेवस्थापन फाटो 24 वरां सादुर आसता.
राज्य आपत्ती वेवस्थापन यंत्रणान मार्गदर्शन आनी प्रशिक्षणा खातीर राष्ट्रीय आपत्ती वेवस्थापन यंत्रणे कडेन (एनडीएमए) संपर्क सादून आसता. पावसात विमानतळाचेर उदक भरले, जाल्यार आपत्कालीन विमानाचे लँडीग करपी वेवस्था दोनूय विमानतळाचेर आसा. विदेशात आपत्ती वेवसथापन कशें तरेन जाता, हे विशीं सुध्दा राज्याच्या यंत्रणेक युएस कोन्सुलेट वरवीं प्रशिक्षण दिला.
म्हापालिका, पंचायतीक पावसाच्या तयारी खातीर निधी
पावसा पयली झाडा कापप तशेंच गटारां निवळ करपा खातीर नगरपालिका तशेच पंचायतींक सरकार निधी दिता. पणजी म्हापालिकेक 1 लाख, ब गट नगरपालिकेक 50 हजार जाल्यार पंचायतींक सरकारान 25 हजारांचो निधी दिला. हे भायर आपत्ती वेवस्थापना खातीर वेगळो निधी आसता. धोक्याची झाडां पंचायती वा नगरपालिकांनी कापपाक जाय, अशें मुख्यमंत्री डॉ. प्रमोद सावंत हांणी सांगला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
