उदकाची परंपरीक वाट बंद केल्ल्यान राया घरांनी उदक
भांगरभूंय | प्रतिनिधी
जिल्होधिकार्यांच्या आदेशा उपरांत वाट मेकळी करतलों : आमदार रेजिनाल्ड
मडगांव, प्रतिनिधी : दामोण रायच्या लोकांचे वसणुकेंतलें उदक व्हांवून वचपाची परंपरीक वाट बंद केल्ल्यान बिरेस्तारा सकाळीं कांय घरांनी उदक घुसलें. आमदार आलेक्स रेजिनाल्ड हांणी दक्षीण गोंय जिल्होधिकारी कार्यालया कडेन हो विशय आडकून आशिल्ल्यान जिल्लोधिकार्यान आदेश जारी केल्या उपरांत रोखडीच उदकाक वाट मेकळी करून दितले अशें स्पश्ट केलें.
राय हांगच्या दामोण पश्चिम भागांतल्या पल्लवी वेरेंकार आनी हेर थळाव्यांच्या घरांनी बिरेस्तारा उदक घुसलें. पावसाचे सुरवातेकूय उदक घुशिल्लें. मात पावसाचें प्रमाण उणें आशिल्ल्यान घरांनी उदक पावूंक नाशिल्लें. हांगा एका थळाव्यान घर बांदतना उदक व्हांवून वचपी परंपरीक वाट मातयेची रास घालून बंद केल्या असो दावो दामोण रायच्या थळाव्यांनी केला.
उदक व्हांवून वचपाची वाट मेकळी करपा खातीर पंचायत, जिल्लोधिकारी कार्यालय, आमदार ह्या सगळ्यां कडेन मागणी करून लेगीत कसलीच कारवाय जावंक ना. दक्षीण गोंय जिल्लोधिकारी अश्विन चंद्रू ए. हांणी आदेशा उपरांत २२ दीस जावन लेगीत कसलीच कारवाय करूंक ना. आतां घरांनी उदक घुशिल्ल्यान हाका लागून भलायकेची समस्या निर्माण जावपाची शक्यताय थळावे उक्तायतात.
आमदार आलेक्स रेजिनाल्ड हांणी, दामोण राय हांगा फाटल्या कांय वर्सां सावन उदक आडकून उरता. हांगा रावपी नवनाथ शिरोडकार हांणी उदक व्हांवून वचपी परंपरीक वाट मातयेची रास घालून बंद केली आनी राखणे वणट उबारली, अशें हांगा रावपी लोक म्हणटात.
दक्षीण गोंय जिल्लोधिकारी कार्यालयांत हें उदक व्हांवून वचपाची परंपरीक वाट मेकळी करपाचे आदेश दिवपाची मागणी केल्या. गरजेची सगळी प्रक्रिया पुराय जाल्या. उपजिल्लोधिकार्या कडल्यान परवानगी मेळ्ळे उपरांत आपूण कामगार घालून उदकाची वाट मेकळी करतलों, अशें आस्वासन आमदार आलेक्स रेजिनाल्ड हांणी दिलां. रातचो पंप मेळूंक नाशिल्ल्यान उदक भायर काडपाचें काम उरलां अशें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
