भांगरभूंय | प्रतिनिधी
जुझे फिलीप डिसोझाः देवदर्शनाच्या नांवान सरकार लोकांक फटयता
भांगरभूंय । प्रतिनिधी
मुरगांवः दक्षीण गोंयांतले लोकसभा वेंचणुकेंत ‘इंडी’ आघाडेचो उमेदवार कॅप्टन विरियातो फर्नांडीस व्हड मतांच्या फरकान जिखतले. एका काळार दक्षीण गोंयांतल्यान जनमत कौला खातीर मतदान जाल्लें तशेंच हे खेपे आघाडीचे उमेदवार कॅप्टन विरियातो फर्नांडीस हांचे खातीर जातलें. दक्षीण तशेंच उत्तर गोंयांत जनमत कौला वेळार जाल्ली क्रांती परतून एकदां जातली. आघाडीचे दक्षीण गोंयचे उमेदवार कॅ. विरियातो तशेंच उत्तर गोंयचे उमेदवार अॅड. रमाकांत खलप जिखून गोंयांत इतिहास घडयतले, अशें आदले मंत्री जुझे फिलीप डिसोझा हांणी सांगलें.
वास्कोचे आदले आमदार तशेंच शरद पवार गोंय राष्ट्रवादी काँग्रेस पक्षाचे अध्यक्ष जुझे फिलीप डिसोझा हांणी वास्कोच्या मेस्तावाड्या वयल्या श्रीराम मंदिरांत वचून देवाचें दर्शन घेतलें. ते उपरांत ते पत्रकारां कडेन उलयताले.
देशभरांत मोदी आड ल्हार पातळ्ळां. गोंयांत लेगीत भाजपाची हार निश्चीत आसा. गोंयांतलो खण वेवसाय सुरू करपाक राज्य भाजप सरकार पुराय अपेशी थारलां. 6 मे ह्या दिसा गोंयांतल्यान वालंकिणी दर्शना खातीर विशेश रेल गाडी दवरपा फाटलें कारण भाजपान स्पश्ट करचें. वालंकिणी रेल्वे दवरून भाविकांक लोकसभा वेंचणुकेंत मतदान करपा पासून पयस दवरपाचें कारस्थान सरकारान रचलां, असो आरोप डिसोझा हांणी केलो. भाजप सरकार अल्पसंख्यांकांच्या रक्षणा खातीर ना, तांचे आड आसा. ह्या पक्षान केन्नाच अल्पसंख्यांकांक आपले अशें मानूंक ना. 6 मे ह्या दिसा वालंकिणी देवदर्शना खातीर वचपाक विशेश रेलगाडी दवरप म्हणल्यार भाविकांक मतदाना पासून पयस दवरपा सारकें आसा. गोंयांतल्या खूबश्या धर्मगुरूंनी 6 मे ह्या दिसा वालंकिणी वचनासतना 7 मे ह्या दिसा मतदान जाले उपरांत वालंकिणी देवदर्शना खातीर वच्चें, असो उलो मारला. विशेश धर्माच्या लोकांक देवदर्शनाच्या नांवान फटोवपाचें कारस्थान भाजप सरकार रचता, असो दावो डिसोझा हांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
