भांगरभूंय | प्रतिनिधी
श्रीपाद नायकः लोकांच्या मागणेक प्राधान्य दिवन कामांक मंजुरी
भांगरभूंय । प्रतिनिधी
पेडणें: खासदार आनी मंत्री म्हूण लोकांनी सांगिल्ल्या प्रकल्पांक मंजुरी दिली. लोकांचे मागणेक प्राधान्य दिवन उत्तर गोंयांत 1,250 प्रकल्प पुराय केले. उरिल्लीं कामांय ह्या काळांत पुराय करतले, अशें उत्तर गोंय खासदार तशेंच केंद्रीय मंत्री श्रीपाद नायक हांणी सांगलें.
विर्नोडें पंचायतींतल्या भूतवाडी वाठारांत खासदार निधींतल्यान रस्त्याचेर नव्यो लायटी घातल्यात. ताचें लोकार्पण केले उपरांत मंत्री नायक उलयताले. ह्या वेळार पेडणेंचे आमदार प्रवीण आर्लेकार, धारगळ जिल्हो पंचायत वांगडी मनोहर धारगळकार, विर्नोडेंची सरपंच सुजाता ठाकूर, पंच स्वाती मालपेकार, मोपाचे सरपंच सुबोध महाले, उमेश तळवणेंकार आनी हेर पंच तशेंच लोक व्हड संख्येन हाजीर आशिल्ले.
उत्तर गोंयांतल्या लोकांनी फाटल्या पांच वेंचणुकांनी आपल्याक भोवमतांनी जिखून दिलो. तांचे उपकार फारीक करचे खातीर आपली जीण पावची ना. तांणी दिल्ले संदीचें भांगर करचे खातीर हे मुखार लेगीत आपली जीण पुराय तरेन उत्तर गोंया खातीर आनी पक्षा खातीर ओंपतलों. उत्तर गोंयांत वेगवेगळे प्रकल्प उबारतना कसलेंच तरेचें राजकारण आनी कसलेच तरेचें धर्माकारण करूंक ना. ज्या लोकांनी, पंचायतींनी आपल्या वाठारांत जे जे प्रकल्प उबारपाची सुचोवणी केली, ते प्रकल्प आपणे पुराय केलेस हाचें आपल्याक समाधान दिसता. हे मुखार लोकांनी आपल्याक लोकसेवा करपाची आनीक एक संद दिवन उरिल्ले प्रकल्प उबारपाक मजत करची, अशें मंत्री नायक हांणी सांगलें.
खासदार म्हूण वर्साक आपल्याक पांच कोटी रुपयांचो निधी मेळटा. त्या निधींतल्यान आपणे पुराय उत्तर गोंयांत जितले मतदारसंघ, जितले गांव आसात, तातूंत एक तरी प्रकल्प उबारपाचो आपलो यत्न आसता. परतून एकदां भाजपान आपल्याचेर विस्वास दवरून आपल्याक उमेदवारी दिल्या. लोकांनी आपल्याक एक संद दिवची, अशें मंत्री नायक हांणी मागलें.
प्रवीण आर्लेकार हांणी सांगलें, मंत्री श्रीपाद नायक हांणी उत्तर गोंयांत जितले प्रकल्प उबारल्यात, तितले हे आदीं कोणेच उबारूंक नाशिल्ले. उत्तर गोंयांतल्यान श्रीपाद भाऊक वेंचून हाडुया, तशेंच दक्षीण गोंयांतल्यानूय भाजपाचोच उमेदवार वेंचून हाडुया. गोंयांत दोनूय खासदार भाजपाचे वेंचून हाडून मोदी सरकाराचे हात घटमूट केले जाल्यार गोंयची आनी पर्यायान देशाची आनीक सर्वांगी उदरगत जातली.
सरपंच सुजाता ठाकूर हांणी सांगलें, विर्नोडें पंचायत वाठारांतल्या गांवगिऱ्या वाठारांनी जंय मुख्य रस्ते आसात, त्या रस्त्याचेर रातचो काळोख पातळटालो. ते रस्तो उजवाड फाकोवपाचें काम मंत्री नायक हांणी आपल्या खासदार निधींतल्यान केलां. येता ते लोकसभा वेंचणुकेंत तांकां पेडणें म्हालांतल्यान विक्रमी मतां दिवया. मनोहर धारगळकार हांणी सांगलें, मंत्री नायक हांणी केल्ली उदरगत आनी आतां मेरेन 1200 परस अदीक प्रकल्पांक मंजुरी दिल्या. आंतरराष्ट्रीय दर्ज्याचो विमानतळ आनी आयुष हॉस्पिटल हे दोन व्हड प्रकल्प पेडणें म्हालांत उबारल्यात. ह्या दोनूय प्रकल्पांत भुंयपुतांक रोजगाराच्यो आनी हेर वेवसायाच्यो संदी उपलब्ध करून दिवपा खातीर यत्न करचे, अशी सुचोवणी केली.
उड्डाण पुला खातीर 100 टक्के यत्न
धारगळ म्हाखाजन ते पत्रादेवी मेरेनच्या रस्त्याचेर राष्ट्रीय म्हामार्ग 66 चेर गरजेचे आशिल्ले उड्डाण पूल तशेंच चलपा खातीर वा राष्ट्रीय म्हामार्ग हुपचे खातीर उड्डाण पूल बांदपाचे आपूण यत्न करतलों. केंद्र सरकारा कडेन ताची आपूण फाटपुरवण करतलों, अशी हमी केंद्रीय मंत्री श्रीपाद नायक हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
