भांगरभूंय | प्रतिनिधी
हवाई दळाचीं दोन हेलिकॉप्टरां करतात उज्याचें सर्वेक्षण
केंद्रीय संरक्षण मंत्र्यान घेतली दखल
केंद्रीय पर्यावरण मंत्र्यान घेतलो नियाळ
पणजी : उज्याचेर नियंंत्रण दवरपा खातीर पुलीस अधिकाऱ्यांनी आपआपल्या वाठारांत पुलीस गस्त वाडोवपाचे निर्देश रानां खात्यान पुलिसांक दिल्यात. रानांत उजो घालपाच्या घडणुकांक आळाबंद हाडपा खातीर रानां खात्याक पुलिसांचे मजतीची गरज आसा. रानां खात्याचे अधिकारी पुलीस गस्त वाडोवपा खातीर उत्तर तशेंच दक्षीण गोंय पुलीस अधिक्षकाक लेखी निर्देश दितले. रानां खात्याचे मंत्री विश्वजीत राणे हांणी ही म्हायती दिली.
गोंयच्या रानांक लागिल्ल्या उज्याचेर नियंत्रण दवरपाक येस आयिल्लें आसलें तरी एक वा दोन सुवातां वेल्या रानांनी अजून उजो पेट्टा. भारतीय हवाई दळाची दोन हेलिकॉप्टरां उज्याचेर नदर दवरपा सयत अदीं मदीं उदकाची फवारणी करतात. आयतारा सकाळ सावन एके नवे सुवातेर उजो पेट्टना दिसलो. उजो पालोवपी दळ तशेंच रानां खात्याच्या अधिकाऱ्यां कडेन हांव सेगीत संपर्कांत आसा अशें रानां खात्याचे मंत्री विश्वजीत राणे हांणी सांगलें.
केंद्रीय संरक्षण मंत्र्या कडल्यान दखल
उजो पालोवपाच्या कामांत नौदळ तशेंच हवाई दळान फावो ती सगली मजत केली. हवाई दळ आनी नौदळाच्या हेलिकॉप्टरांनी सर्वेक्षण करपा सयत उदकाची फवारणी केली. हेलिकॉप्टरांतल्यान उदकाची फवारणी केल्ल्यान उज्याचेर नियंत्रण मेळप शक्य जालें. केंद्रीय संरक्षण मंत्री राजनाथ सिंह हांच्या सहकार्याक लागून हें शक्य जालें अशें रानां खात्याचे मंत्री विश्वजीत राणे हांणी सांगलें.
केंद्रीय पर्यावरण मंत्र्यांन घेतलो नियाळ
केंद्रीय पर्यावरण मंत्री भुपेंद्र यादव हे लेगीत उज्याचे स्थितीचेर लक्ष दवरून आसात. तांचे सहकार्य लेगीत मोलादीक आसा अशें रानां खात्याच्या मंत्र्यांनी म्हणलें.
दोन दिसां पयलीं प्रधानमंत्री नरेंद्र मोदी हांणी लेगीत उज्याचो उल्लेख करतना मजतीचें आस्वासन दिल्लें. प्रधानमंत्री नरेंद्र मोदी हांचे सयत केंद्रीय संरक्षण मंत्री राजनाथ सिंह तशेंच पर्यावरण मंत्री भुपेंद्र यादव हांणी लेगीत सहकार्य केलां.
रानांनी उजो लागपाचें कारण अजून कळूंक ना. कांय कडेन लोकांच्या निश्काळजीपणाक लागून उजो पातळपाची शक्यताय आसा. उज्याच्या घडणुकांक आळाबंद हाडपा खातीर सरकारान रानांतलो प्रवेश बंद केला. उज्याचेर नियंत्रण दवरपा खातीर रानां खात्याक पुलिसांचे मजतीची गरज आसा. नदर दवरपा खातीर पुलिसांनी गस्त वाडोवपाचे निर्देश मंत्री ह्या नात्यान हांवें दिल्यात. रानां खातें उत्तर तशेंच दक्षीण गोंय पुलीस अधिक्षक हांकां पत्र बरोवन निर्देश दिवपाचें आसा.
सगल्यांत पयलीं साट्रेच्य रानाक उजो लागलो. हाचे उपरांत देरोडें, पारोडें, सुर्ला, म्हादय अभयारण्य वाठार, धारबांदोडें, कालें, पर्रा, कुठ्ठाळी हांगाच्या रानांनी उजो लागलो. उजो लागपाच्या घडणुकांचो तपास सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
