उक्ते सुवातेर कोयर उडोवपी 14 जाणांक अडेज हजारांचो दंड

भांगरभूंय | प्रतिनिधी

गोंय घन कोयर वेवस्थापन आनी प्रदुशण नियंत्रण मंडळाची कारवाय

मडगांव, प्रतिनिधी ः कोयराची समस्या खूब गंभीर जाल्या. हाचेर नियंत्रण मेळोवपा खातीर गोंय घन कोयर वेवस्थापन मंडळ आनी गोंय प्रदुशण नियंत्रण म्हामंडळान संयुक्तपणान कारवाय करपाक सुरवात केलां. दवर्ले, रावणफोंड, सां जुझे दी अरियाल वाठारांत कोयर उडोवपी 14 जाणांक दरेकीं 2500 रुपयांचो दंड घालो. ही कारवाय अशीच चालू उरतली अशेंय अधिकाऱ्यांनी सांगलें.
कोयराची समस्या सोडोवपाक ही दंडात्मक कारवाय सुरु केल्या. उक्ते सुवातेर आनी रस्त्या कुशीक कोयर उडोवपी शेंकड्यांनी लोक आसात. तांचेर ही कारवाय जातली. वेगवेगळे पंगड तयार करून गोंय घन कोयर वेवस्थापन म्हामंडळाचे अधिकारी आनी गोंय प्रदुशण नियंत्रण मंडळाचे अधिकारी थळाव्या पुलिसांचे मजतीन शुक्रारा सकाळीं सावन ते 10 वरां मेरेन कोयर उडोवपाच्या सुवातींनी पंगड तैनात केल्ले. सां जुझे दी आरीयल पंचायत, दवर्ले मारुती मंदिर लागसारच्या रस्त्याचेर, आके पंचायत वाठारांत, रावणफोंड सर्कल लागसार पंगडांन कोयर उडयतना नागरिकांक धरल्यात. शुक्रारा 14 जाणांचेर कारवाय करून गोंय कोयर नियंत्रण कायद्या खाला दरेकीं 2500 रुपया दंड वसूल केलो.