भांगरभूंय | प्रतिनिधी
कोरगांव, प्रतिनिधी ः मांद्रेंच्या नव्या पुलीस स्टेशनाच्या उक्तावणा वेळार थळावे सरपंच अमित सावंत हांकां आपयलें ना. कार्यावळीच्या उक्तावण पत्रकांतय ताचें नांव नाशिल्लें. ते उपरांत पुलीस स्टेशनाचे उक्तावण फलकाचेरुय तांचें नांव ना. हाका लागून सरपंच सावंतान आंदोलनाची शिटकावणी दिल्या. 1 फेब्रुवारी मेरेन ह्या फलकाचेर नांवाचो उल्लेख करचो, नाजाल्यार मांद्रेंच्या भाऊसाहेब बांदोडकार स्मारका मुखार आमरण उपोशण करतलो अशी शिटकावणी तांणी दिली.
मांद्रेंच्या नव्या पुलीस स्टेशनाचें उक्तावण 25 तारखेक मुख्यमंत्री डॉ. प्रमोद सावंत हांच्या हस्तुकीं केले. पूण हांगा फकत मुख्यमंत्री, थळावे आमदार आनी डीजीपी हांचीं नांवां आशिल्ली. थळाव्या स्वशासकीय संस्थांक कांयच किंमत दिवंक ना. ही चूक सरकारान सुदारची. फलकाचेर रोखडेंच सरपंच म्हणून नांव बरोवन शिश्टाचार पाळचो. ही चूक 1 फेब्रुवारी मेरेन सुदारली ना जाल्यार मांद्रे पंचायत कार्यालया मुखार भाऊसाहेब बांदोडकार स्मारका मुखार आमरण उपोषण सुरू करतलो अशें शिटकावणी मांद्रेंचें सरपंच सांवत हांणी दिली.
मजगतीं, मांद्रेंच्या एका पंचायत वांगड्याक मारपेट केल्ल्याची पोस्ट सोशल मिडियाचेर व्हायरल जाल्या. गृहखात्यान हे घडणुकेची चवकशी करून संबंदीत लोकप्रतिनिधीचें नांव लोकां मुखार हाडचें अशी मागणी सरपंच सावंत हांणी ह्या वेळार केली. हे बाबतींत कांयच हालचाल जावंक ना जाल्यार उपोशणाच्या वेळार लोकप्रतिनिधीचें नांव जाहीर करतलो अशीय शिटकावणी तांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
