ईव्हीएम, व्हीव्हीपॅट मशीनां सयत हेर सामान स्ट्राँग रूमांत
भांगरभूंय | प्रतिनिधी
मडगांव, प्रतिनिधी ः राज्यांत मतदार जागृताय कार्यावळ करतना वेंचणूक केंद्रांक ईव्हीएम आनी हेर साहित्य धाडपाचेरूय वेंचणूक आयोगान भर दिला. दक्षीण गोंयांतल्या वेगवेगळ्या केंद्रांनी आनी मतदारसंघांनी ईव्हीएम मशीन तपासल्या उपरांत सामान वेगळें करून दक्षीण गोंय जिल्होधिकारी केंद्रांतल्या स्ट्राँग रूमांत दवरला.
दक्षीण गोंयांतले वेंचणुकेचे तयारेक जिल्लोधिकारी आनी जिल्लो वेंचणूक अधिकारी हांच्या मार्गदर्शना खाला सुरवात जाल्या. जाय आशिल्ली सगळी ईव्हीएम, व्हीव्हीपॅट आनी कंट्रोल युनिट यंत्रणा दक्षीण गोंय जिल्होधिकारी केंद्राच्या पोरणें इमारतींतल्या स्ट्राँग रूमांत दवरली. गोंयांत लोकसभा वेंचणूक 7 मेक जातली, आनी हे खातीर दक्षीण गोंयांतल्या 20 मतदारसंघा प्रमाण मशीनांची वांटणी करून त्या मशीनांची तपासणी करपाचें काम सुरू केलां.
दक्षीण गोंयच्या सगल्या मतदारसंघांच्या मतदान केंद्रांतल्या अधिकाऱ्यांक शुक्रारा दक्षीण गोंय जिल्होधिकारी केंद्राच्या पोरणें इमारतींत आपयलें. मतदारसंघा प्रमाण मतदार केंद्रा प्रमाण दरेका ईव्हीएम मशीनाची तपासणी जाली. ते उपरांत मतदान केंद्रांत जाय आशिल्लीं पेनां, पेन्सिल, पट्टी आनी हेर स्टेशनरीय मतदान केंद्राच्या अधिकाऱ्यां कडेन दिली. दक्षीण गोंयच्या 20 मतदारसंघा प्रमाण मतदान केंद्रा प्रमाण ईव्हीएम आनी हेर साहित्य वांटून दिल्लें.
हाचे भायर 17 एप्रीलाक परतून ह्या साहित्याची चांचणी जातली. जिल्लोधिकारी कार्यालयांतल्या वेंचणुके खातीर नेमणूक करपी अधिकाऱ्यांच्या हाजिरेंत आनी खर पुलीस सुरक्षा खाला ही प्रक्रिया केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
